Gorkhaland akhangba ABSU-i pusemer

Kokrajhar, June 18 (Agencies): All Bodo Students Union (ABSU)-i Honibarnü ‘Gorkhaland’ akhangba pusemba metetdaktsüogo aser parnoki tang Darjeeling nung mepetmesü adoka aliba ya West Bengal aser centre sorkar makümba ajanga ta tongloktsüogo.
“Darjeeling meketa aliba tesem nung mepetmesü adoka aliba ya Bengal sorkar-i amokbanger yimsüasüba aser Centre sorkari tebilemtsütem temolung magütsüi toktsüba ajanga atokba lir,” ta ABSU tir Pramod Boro-i Darjelling nung osangbenertem dang ashi.
Pai ashiba agi, Gorkha Janamukti Morcha (GJM) takhangba ya putiotsü aser linük temzüng kübok tim takhangba ka lir, aser iba takhangba ya shidak aser ochi takhangba ka lir.
“National Federation for New States (NFNS) nung züngsem ka ama onoki Gorkha nungeri Gorkhaland akhangba pusemer,” ta Boro-i ashi.
Ajisüaka ABSU leniri GJM lenirtem dang democratic yimya nung aser yimjung nung azü medokshi-i nüburtem anitsü asoshi mepishe. Pai ano Bengal sorkar dang iba tesem nung yimjung bener arutsü asoshi mepishi.
ABSU-i maneni Centre sorkar dang iba ken o nung teka ia Gorkha nungeri Gorkhaland state ka akhangba agüja iba tesem nung teti asoshi yimjung bener arutsü asoshi mepishi.
“Onoki Centre-i iba ken o reprangshitsü asoshi akhanger kechiyong iba ya election madong tsüngda BJP pur tenangzükba ka liasü aser ano party central committee-i iba ken o nung parnok tebilemba jangjashitsütsüla,” ta paisa ashi.
ABSU-i Bodoland state balaka akhangba dak sendakba nung Boro-i ashiba agi, Centre aser state sorkari parnok takhangba tangsa mataloktsüra parnoki longkak aitba sentong; mapang telatetka makai national highway aser train lenmangtem mokdangba amala, September ita nungi tenzüktsü.