Government-i junga langzüogo

All Nagaland College Students’ Union (ANCSU)-i aginüba ama tamalen kaketshirtem nem scholarship mapang shitak nung magütsüi amshiadokba maparentem tekaratiba nung bushisüngdanger metetdaktsütsü aser Higher Education deparment kübok tesayurtem shimtsü liaka meshimi aruba maparentema yaktasa Nagaland Public Service Commission ajanga shimdaktsütsü ta government-i nangzükbaji kaketshirtem asoshi dang masü saka ajak asoshi osang tajung ka asütsü. Atangji, government mapa nung timi meinyakba maparentem bushisüngdanger tapet temerenshi agütsütsü aser tesayurtem mapang shitak nung shima kaketrejutemi yoktsübaji nisung kari longkak aita molumiyonga government-i inyaktsüba tata shilem ka lir. Ajisüaka, asen lima aser asen government agi ojangji, tanuri majep tashibo tetsüi mama meyongdaktsü ama, nübortem longkak aita takoksa aser tesama kar majuru tashibo teinyaktsülaka asüyonga meinyaker. Ashiko, teinyaktsülaka ser meinyak ataba nungji karbo tajangzük nguya alitsüa akok saka kar tajangzük arishidang pei lima aser nübortem akoksatsüsa inyakra, iba tajangzük jagibo azükaru masü lendongang bener arutsü. Aji oda, tangar meyonga masü saka sensaker chirnurtem meyong scholarship tim mesüi amshisang mesüra amshilajibo idangyongjisa bushisüngdanger merenshir alitsüba mapa ka mebushiner aser memerenshinür amai mapang talangka züdaka yutsüba jagi, tangartem danga iba amaji tim mesüi inyakyonga kecha masütsü ta sayutsüngir amato akümer. Iba jagi yimten nung temzüng ozüng maka akümer aser pei sünütsü asüdang nübortem akoksadaktsür. Atangji, tangbo iba ken o ya akhidang Vigilance Commission ta ajaba Lok Ayukta ket nung lir. Joko, government-i kaketshirtem dang tekaratiba nung tebushitetba osang agütsütsü nangzüker asünungji, Lok Ayukta-ia memenutsütsü imlar. Tanabuba onükji, college nung teayurtem shimtsü asoshi anendaka aliba mapa ya asütsü. Mapa ajak rongnung tesayur mapa yasa tongtibangba, anungji tesayurtembo jungjunga tendanger tesayur inyaktsü temsüa alirtem dang shimtsüla. Iba tangatetba nung tesayurtembo Nagaland Public Service Commission ajanga dang shimdaktsür. Aji oda, teshimtettertem asoshia NPSC ajanga shimba nungji meraket aser temulung lemtet ka lir. Ajisüaka, aiben teinyakdak ketdangsertemi tatidang magii dang pei mulungba nung shimer. Iba jagi tesayur inyaktsü temsüa alirtem aika atema mapa angutsüba lenmang shibanga toktsür. Ibaji dang masü saka NPSC majangi shimba tesayurtemji tajungbo masütsüa akok. Aji oda, mapa mashi aser memetet ser ita sen achitsü kija atema shimba teayurtem jagi kaketshirtem taküm aika raksatsütsü. Ibaji medical doctor jungjunga mazüng ser mapai kishi mashilen nungi aiba purtemi shiranger anepalu mashi nisung südaktsü amato asütsü. Tanübo school nung dena graduate tesayurtem  nungi shir college nung sayutsü atema tesayurtem shimdang NPSC ajanga tatidang jungjunga agir shimba agi, küm ishika tsüngda government school-tem ya private school dang nungi tajungba akümtsü teimla tulu lir. Ano, ANCSU teloki abenba onük kaji Kohima nung Science College atema lazükba li joko nübortemi tuluka atsüngsepa agiu asünungji, iba liji government ket nung kümzüka ayutsü rongdak nüngdakba indang liasü. Item onüktemjibo mashiyonga aser takangba magütsüyonga government-i inyakadoker alitsüba mapa ka lir. Tanübo talangka maodang aser taküma mesamadang, government-i kaketshirtem jaoka ken o lemtepba ajanga memetetba aser manguba lendong timtem aser takoksa aika nungi jenbuogo. Ajisüaka, nübortemi ola madok yutsüba maparen tashi nungbo pei inyaknütsü inyaktsü, pei shimnütsü shimtsü aser pei aginütsü agitsü ta temzüng ozünga maka amato inyakra, alima kanga akoksatsü. Atangji, asen lima nung yimten majungbaji yimsüsür kija majungba agi masü  saka nübortem  majungba agi yimten majunger. Nobortemisa ochimashi mapa teinyaknüba, meinyaki techiyongnüba aser tatidang majangi mapa angutsü merangteper agi sünga lir. Iba jagi ochimashi anemabo nübortemi ola madoktetter. Ajisüaka, ochimashi aser tim masüba mapa anema ola madok tashi yimsüsür aser ketdangsertem aikati alima morumoru tatidang makoktsü.