Government-i lanurtem tsübur

Asenoki repranga lia alima tesem aika nung lanurtemi nübortem dang memeimba aser ochimashiba yimten atsüngdoker yimten lenirtem tasen agi melenba tatalokbatem angur. Kasaji, India nunga ataloktsü amai, tang Cockroach Janta Party (CJP) teloki anir lanurtemi government inyakyim anema apusoba angur. Aji oda, CJP teloki aniba lanurtemi tawa Union Education minister mapa nungi anendaktsüogo aser ano tang Chief Election Commissioner, Gyanesh Kumar mapa nungi anentsüla ta takangba agüja lir. Iba takangbaji tang tashibo government-i mangar, kechiyong government asoshi CJP telok ama kati akangba ajak ataloktsüyonga aotsübaji tasak lir. Ajisüaka, lanurtemi akangbaji mataloktsü majungtsüsa CJP teloki anir tanü nungi Jantar Mantar tesem nung linük tesem ajaklen nungi adenshia Chief Election Commissioner Gyanesh Kumar mapa nungi anentsü atema takangba agüja longkak aittsü sentong tulu lir. Atangji, longkak aitba sentong nung ya lanurtem dang masü saka tang Electoral Special Intensive Revision agiba sentong ajanga voter list nungi tenüng agientsürtem ajak shilem agitsü amai angateter. Ibaji shitak süteta sentep nungbo nisung lakh dak tali senteptsü aser iba ama telok tulujibo police-temia menokdangtettsü. Ibaji meteta, tangbo tanga len nungi Delhi-i aruba train marudaktsüi nokdanga lir aser yimti nung  ali telunglen jajaba metro train dena mejajadaktsüi anendaktsüogo. Itemji dang masü saka yimti nung senzüba Ola aser Uber taxi ajak anendakja lir aser internet dena shibangtsüogo Tetezüji, government-i state balala nungi nübortem aika aruagi Jantar Mantar nung CJP teloki aniba longkak aitba sentong nung adentsübaji tsübua bilemer. Atangji, ibaji government asoshia shisabolutsüka lir, kechiyong linük nung government dang jashir aser ano electoral roll nung nisung shitak lir ser nung tenüng agientsürtem ajak aden shi nungbo police-temia menokdangtettsüsa lendong ataloktsü ana nung lir. Item ajakji rajema government-i CJP teloki aniba sentongji tamakok ngudaktsütsü asoshi inyaker. Ashiko, government ka asoshi itemji teinyaktsüka inyaker asütsüa akok. Ajisüaka, tang India nung lanurtemi anir BJP teloki aniba government anema apusoba sentong ya government-i tang amaji tashiyim amshia nokdangtettsüba sentong ka masü amai odagi. Ibai tanü putu nung India nüchiso bushiba sentong amato ka kümogo. Aji oda, tangbo joko Chief Election Commissioner mapa nungi anentsü akangba mapa nung ya lanurtem aser  yimten teloktem dang masü saka okatsürtem aser taoba obendangertem aika dena lir. Ibayongji, obendangdak obendangertemia government tsütsü atsünga obendang agütsütsübaji kanga tasak kümogo. Ibai Narendra Modii aniba government asoshi tensa mapang tasak ka lir, kechiyong CJP teloki akangba ajak ataloktsüyonga aotsübaji parnok asoshi pei nok agi pei yirur amato asütsü aser ano Chief Election Commissioner yabo mapa nungi anendaktsüyonga, aji tatem masü saka CJP teloki pajibo pua tepuokdak yur okadak pai aibelenba ken o jembitsü akangtsü. Tanü alima nung lanur tashiji aji lir. Ajisüaka, aji küm agi lanur asüba agi inyakteter masü saka pei lima meimba shisatsü, pei sobaliba metetba taküm, pei yimten temeten angatetba teindang aser ochishir  aser kanga junga zünga shia metetba lanurtem asüba agi tashi aser tasü itta inyakteter. Iba tangatetbaji kodang lanur ka dak lidir, la mesüra pajibo kecha agia memesüzüktettsü aser government-i tsübua-ang bilemtsü. Item ama lanurtemji Delhi nung dang masü saka asen lima nunga kanga nüngdaker.