Government li rakzükba

Tang Dimapur Government college aliba li ya dena mali küma rakzür asütsülaba agi kaketshirtemi meranga nokdangba ajanga wazüka yutetogo ta yakanü Dimapur Govt. College pur Golden Jubilee sentong nung jembidang Chief minister, T.R.Zeliangi ashibaji shitak lir. Mapang kabo tang Dimapur college campus atsübanga aliba atsü telong nung ya nisung karibo azü ki yanglur alitsü tenzükya liasü. Idangji, administration-i kecha mashi anungji college bangdakia kecha meshitet. Iba ama tensa tia ka nung nisung ajaki repranga lia tang Dimapur Govt. College lapoka aliba ali ya tulubalenka rakzüka tudaktsür liasü. Iba tiaji ngua college nung azünger kaketshirtemi item kitemji bendoktsü aser shinga nema college liji merakzükdaktsüi nokdanga aruogo.Ashiko, ano tanga nisung karibo college liji rakzüktsü bilema alitsüa akok aser government tenüng nung government li anükertemia allotment agütsünüang alitsü. Ajisüaka, tamalen amato tanüa kaketshirtemi tarutsü lanurtem asoshi tang tashi nung wazüktetba li yabo shinga nema merakzükdaktsüi wazüka ayutsü imlar.Nagaland junga mainba tashidak aika lir aser item tashidaktem rongnung kaji asenoki government li rakzüka agiba tashidak ya asütsü. Atangji, government li rakzüka agibaji lokti asoshi tashidak kechiyong iba yagi alima rajang kümdaktsür. Aji oda, government nem nübortem asoshi terenlok mapa inyaktsü atema ali tenlatsü melen government li rakzüka agiba mulungjang nungji alima aser nübortem meimba shisatsü malia ta sayur. Ano, tezüdangtsü kaji government li anüktsü asoshi khuret agütsür ketdangsertemiang anir government li ya private nem allotment agütsür. Item government ketdangsertem shirnoki government mapayui government li alemer, parnokji nübortem asoshi bilemer masü saka pei kija ajangzüktsü bilemertem lir. Dimapur ama nung balaka district administration-i tarutsü lanurtem asoshi kecha mebilemdangi government li ajak private nem agütsüba angudang temulung kanga shia bilemer. Atangji, akhidang government-i yangluba kiojentema meyangluteter, anungji item ki aser kimongji nüngdak mali amto akümer. Ajisüaka, item kimongtem jagi tanurtem asoshi ‘Children park’ tajung ka yanglua yutsü nungbo mesüra lanurtem asoshi asayadak tajung ka yanglua yutsü nungbo mesüra tanurtem asoshi dang masü saka tantsür-tamburtem ajurutepa otsü atongdak moapu tajung yanglu toktsü nungbo, ajak asoshi tajangzük aser asen lima koda topur jungla ta bilemer. Government libo ajak lema agütsü saka mepu mesüra kiyong kecha nunga tanurtem kazüdak mesüra asayadak moapu tilakata mali ta asen lima mashileni renlokdaktsüba angudang tanurtem tsüngdang taaktsüka lir. Aji oda, government li rakzükba mesüra government li lema agütsüba mapatem rongnung ajak  dang tejashitsü tulutibaji kaketreju atema shiteta ayuba li rakzükba mesüra agütsüba ya asütsü. College asütsüa akok mesüra school asütsüa akok, kaketreju asoshi ali tulu nüngdaker, kechiyong kaketreju nung azüngertem atema takdang tesadem asütsüsa ki tulu nüngdaker, kilong aser kima asayadak tesem tesadem alitsüla, moapu tulu nung süngdonglidong peria meyidaktsütsüla. Aji oda, kaktereju yabo shinga jurila indang masü ajak asoshi, yangjibo ali rakzüker chirnurtem dena azüngtsü. Atangji, tanübo iba kaketreju nungji asen chirnurtembo mazüngtsüa akok saka alima ya temelenshiba lima, kechiyong tesüpur agi tejaklen pur, tejaklen pur agi tesülenpur, tilar agi tulur aser tulur agi tilar, sensaker agi takar aser takar agi sensaker ta melentepa lia aoba asenok nük agi angutsü. Item tatalokbatem nungi shinga mejenbutettsü. Aji oda, tanü asenoki ali rakzükba school mesüra college nungjiang asüngbo asen chirnur mesüra semchirsemnurtem azüngtsüa akok. Tanü iba yimobilem nung nisungtemi government li rakzükba indang tebilemba kar lemsatepba ajanga district shia nung government li anükertem  dang mepishinübaji, tanükerji tanüker ama tanü aser teti nübortem ajangzüktsüsa government li ajunga wazüka yutettsüla aser tangatetba aser nükla tuluba nung amshitettsüla.