Government mali !

Nagaland nung government nung alirtem dak alaka yimten aser lokti lenirtem aikati Kohima aser Dimapur dak alaka Nagaland kübok tanga district-tem nungbo state government aliba mong kecha mangur ta tejashi aser tesasaba o jembir. Kasaji tang tasen tentetba yimten telok Raising Peoples’ Party (RPP) purtemia parnok tetsüng agi Nagaland tesem kar sema jajaba sülen, parnok tenük agi anguba kuli ka ashibaji, Mokokchung district ama nunga gari sadema moutetba yimtsüngtem aika lir, ajisüaka iba dang nung jagi tamajungba, tesasatsüka, Nagaland anüdoklenbo tesem ajaklen government aliba tamaitsü kecha mangur ta metetdaktsüba osangji liasü. Atangji, iba osangji nunga ta meshitettsü. Akok ka asübo, Nagaland nung government mali ama anguba tesemtem ajakji video agir sayu asübo nisung aika aoksala. Iba ama shiba dangang kechi mashi aser metongloktsü aliba mapang ka , ano Tuensang nung  Chang kaketshirtemi PWD (H) Executive Engineer office shibanga yutsüba jagi yangjia government maliba kuli ka sayur.Chang kaketshirtemi ashiba agi, joko küm 16 shi PWD office nung inyakertemji gari ayudak ki garage ama ka nung inyaker aser tanga terenlok mapatema aika meinyak aser merenem yuja lir. Kasaji, tamalena Mon district nunga kaketshirtemi Education office agi office memesük ki tejen tamajung ka shibanga yutsüba asenoki nguogo. Iba amaji Nagaland nung gari lenmang tamajung nung gari tajung raksaa jajadang government menungrar aser item lenmangtemji government nem ngudaktsüner. Ano, Tuensang alema orrbo mesüra Mon district nungsa asüyonga arrtsülen aliba purtembo kechi komaka tia nung alitsüar ashitsü makok. Nagaland aliba tamaitsü metettsübaji parnok yim tonga gari lenmang tajung alitsüla, electric light tesangwa agi manüngtsüla, joko tokolak nung tzüshi bener tzüdai maotsüla, mozü ki bushia aodang süngra nung apur aotsüsaba tia nung malitsüla aser angati kaketshisatsü tajung pei alidak angutsü tim. Ano, asenoki anüdoklen alirtem indangang süoki taiba bilemtsür dang ashi, anülulen Peren district nunga tang tashi yamai alir na (?) ta asütsüsa nübortem teküpbok tia nung aliba asenoki angutsü. Itemji kodang Dimapur aser Kohima den medemdangdir, atangji temetemdangtsüla masü, kechiyong Dimapur aser Kohima nungbo gari lenmang terabo junga lir aser mozü ki aser kaketreju tajung aika lir. Ajisüaka, kodang asenoki Kohima aser Dimapur dak alaka Nagaland nung tanga tesembo government-a mali amato sendoka tokja lir ta jembidir, Kohima aser Dimapur yimti yimdong nungbo Guwahati aser Imphal ama  ajem tsüka ngua temerük aser tajung alitsü amai bilemer. Aji oda, Kohima aser Dimapur nung akaba government school aser mozü kitembo teronema menema jungjunga anepalua alitsüla amai bilemer. Ajisüaka, Dimapur aser Kohima-ji private meyong mozü ki aser kaketreju kar aliba agi tanga yimti tera mesüka angur ashi, shitakba nungbo Dimapur yimtibo tangar dang sayutsüla masü.Yimdong anak auyi agi sünga lir aser aonung yimdong nung street light tsükloka mangutsü. Ano, Nagaland nung government aliba aser maliba indang tejembidak nung, Dimapur nung aonung tetsür tebur adenshia yi jema tsüngsangdak night club-tem NSCN-IM government-i shibangtsüogo. Nagaland nung state government ali maliji item kulitem jagi ashitsü. Anüngdang pei pei ali alir aser aonung yimti anüker mali, tesem ajaklen japujari ozüng raksaba mapa agi sünga lir, saka tenokdanger aser tazüoker mali, anungji karibo azüoktsüla aser reprangtsüla. Nagaland tenüng nung ajaki tajangzükbo aginer saka Nagaland anepalur mali kümogo. Nagaland tenüng nung ita sen achir tetsa saka Nagaland asoshi inyakerbo mangur. Asenok ya ak ama dang, shibanga yur India government nem mesüdaktsürtem lir. Joko, yamai melii nüchi küma aruagi, Nagaland tesem ajaklen government aliba nübortemi metettsüsa, pei pei constituency nung pei pei MLA-i anir inyaktsüla aser pei pei department aser pei pei office nung tokolak purtemi anir nübortem meima tenzüktsü tim.