Government mapa nung shimba

Nagaland nung ajaki meteta tim mesüi inyakba mapa kaji government nung tashi itta alirtemi government mapa nung pei shimnütsü shimba inyakyim ya asütsü. Iba inyakyim nungji tejak reprangba, sen amshiba, mapa makokba aser state tejakleni onüaka moutetba timtem ajak keta lir. Iba jagi langa alirtem government mapa mangur saka melangi liaka government nung teyaritepertem lira melamelaa angur. Atangji, government nung teyariteper aliba agi government mapa angubaji tim amato, saka asenok asoshi shitak mesükba tai lenmangji aji ka asütsü. Government mapa angutsüba yabo kinunger pi ta masü aser government nung teyariteper ali mali ta masü saka zünga meteta alir aser mapa inyak ashir aser temsüa alirtem shimtsü tim. Ajisüaka, asen lima nungbo government mapa angutsü atema mezüngbuba aser tongtibangtiba ‘qualification’ji election nung asemer ka adoktsüla aser iba MLA-baji ruling nung alitsüla. Tanabuba, ‘qualification’ji government nung jenjang temaba nung alir tulur karbo alitsüla. Tasembuba nung, teyarir mali nungbo sen agi alitsü, anungji sen alitsüla. Ano Nagaland asoshi tia tamajungtibaji nisungtem mapai aitsüba tesemji tanga’industry’ tulu kecha mali saka government mapai aitsüba dang lir. Iba tia aser tim masüba inyakyim aser temenentem jagi Nagalangd arar aser government mapa angur kabo ngupet angur aser mangur karbo temsüa liaka mangur. Iba jagi Nagaland nung takartem takarba aser tulurtem tuluba akümdang, sensakertem tesensakba aser tilartem tilaba akümer. Iba amaisa memelenshii ora, Naga nungertem rongnung memenui sensakertem o takartem na aser tulurtem o tilartem na tsüngda rara tulu adoktsü. Idangjibo, takar aser tulurtema pei kidang ayipmajangtsü aser sensaker aser tilartema kanga akoksatsü, anungji kanga timtemteptsü. Aji oda, kodang temsüa alirtem meshimlir, alima nung tejashi tulu alitsü aser lendong ataloktsü. Tanü government nung alirtemi tarutsü nung item timtem lendong ataloktsübaji yimdangi arua government mapa nung inyaktsü shimba inyakyim ya shitak lateta amshi tenzüktsüla. Atangji, government mapasa süaka menden temaba aser tuluba asoshi shimtsü atemabo Nagaland Public Service Commission (NPSC) ajanga agir. Aji junger. Ajisüaka, ano kanga majung kaji NPSC ajanga shimtsüba mapa tulutem dena NPSC nem magütsüi government nung alirtemi tashi amshia pei shimnütsü shimer. Yangi tamalen shimsema aliba ‘qualifications’ malirtem asoshibo aji alima tatem asütsü. Ibaji jepaka nüktzü malu. Iba ama tashimaitertem mezüngmeshiba inyakyimtemji melenshidaktsütsü asoshi Naga nunger lokti tentet karibo nüngsen aser timtem tulu agia government den jembir. Item teloktem rongnung Naga Students’ Federation (NSF) aser Public Service Aspirants of Nagaland (PSAN) teloktemi government mapa nung shimtsü atema NPSC ajanga magiba mapatem ajak Staff Selection Board ka ajanga shimtsüla ta akangba asenoki angashidagi. Nagaland nungbo tim mapa aser tajung inyaktsübabo telok kari longkak aita ola madokra meinyaktsü aser item ama telok jagi ola adoka angashira, komaka ser anendaktsütsü dang merangtsü. Ibaji tanü lanurtem asoshi tia kanga majung asütsü. Iba jagi asenok ajak atema tarutsü anogotem tajungba asütsü melena menena toktsür. Shitakba agibo, government mapa inyakertem shimtsü atema Staff Slection Board ka alitsübaji mapa tasen ka masü mesüra state government dang shimang ta ashitsüa menüngdak, kechiyong ibaibo tamasayongi shimer alitsüba nüngdak mapa ka lir. Ibayongji center government nunga lir aser tanga state shia nung State Staff Selection Board lir. Asenoki Nagaland shirangba tashidak ya jungjunga reprangdangra, ibai government mapa inyakertem shitak meshimba ajanga adokba tashidak teimba asütsü. Tejak repranga shim nungji mapa makoker aser nendaka meinyaker, ochimashi ajanga shim nungji mezüng anogo nungi ochimashitsü tenzüker aser election junga magitetba ya dena government mapa tatidang magii shimdaktsütsü tebilemba nung yaritepba ajanga lir. Itemji kodang bilemdangdir, Nagaland aneptsübaji Staff Selction Board shima government mapa inyakertem shimba nungi tenzüktsü.