Government mapai aitsü lenmang mali akümer: K G Kenye

Kohima, Oct 6 (TYO): Nagaland nung government mapai aitsü asoshi lenmang mali kümogo, anungji zünger mapa mengui alir Naga nunger lanurtem aika government mapa nung manioktettsü ta tanü Nagaland nungi yokba Rajya Sabha tatar, K G Kenye-i metetdaktsü.
Pai iba o ya tanü Kohima nung Spectrum ta ser e-Hub ka lapoktsüba sentong nung jembidang metetdaktsü. Tanü Nagaland nung tebilemtsü tulutibaji state government-i mapa magütsütetter saka Naga nunger lanurtem aikati zünger government mapa dang bushir kechiyong state nung tanga mapa inyaktsüsa private sector nung industries ama lapoka mali ta paisa ashi.
Tanü tashi Nagaland nung Naga nunger lanurtem zünger mapa mangutsüsa timtemba taoba küm aika Naga yimten ken o melatetteti aruba timtem ajanga lir, kechiyong iba ama yimten tebilemtsü aliba ajanga Nagaland nung private telok arua mapa meinyaktetter ta paisa ashi.
Iba denji ano Naga nunger sobaliba nung industry lapoka business inyaktsüba inyakyim maliba ajanga aikati tebilema mebilemer, ajisüaka tanübo lanurtem karibo peisasa pei akok mapa inyak tenzüka takok ngua inyakba angudang kanga pelar aser iba amaji lanurtem ajaki peisasa inyaktetba mapa tenzüka inyaktsü ajungshir ta paisa metetdaktsü.
Tanü putu nungbo government mapa inyakba dang nungibo peisasa mapa tilaka tenzüka inyakba nung tajangzük tuluba angur, anungji tetenzükdang timtemba aser takoksa anguba ajak tizükteta pei jangraba aser nübortem nüngdakba mapa peisasa tenzüka inyaktsüla ta Rajya Sabha tatarisa ajungshi.
Iba e-hub dokan lapokba sentong nung NPF tir Dr. Shurhozelie Liezietsu-a dena liasü. Iba dokan nung electronics oset TV, cameras aser music system nungertem angutsü.