Government mozüki jungdaktsüner

Tanü asüng balaka tashidak tapu balala agi nisungtem kanga shirangteper. Idangji, nisung aika tashidak putettsü atema azü tendangtsü asoshia sen maka shisabolua timtemba tia nung ajurur. Tanü putu ya akhi putu ama masü tapi agi mozü achitsüba putu masü, iba jagi temang tamajungba dang kümdaktsütsü. Ibayongji, temang temekong küma asüker aser ano tatsük küma metar ta shirang nunga tamasa azü tendanger, kechiyong yamaji shirangbaji ramen mesüra typhoid asütsüa akok mesüra dengue tashidakang asütsüa akok mesüra ano poknüng majungba agi shiranger asütsüa akok. Takar asoshibo kecha mali, private mozü ki tajung aika lir, ano tanglenia mozüki tajungba bushia aotsüa akok, saka sensakertem asoshibo government mozü kidang angati azü tendangtsüsa mekara, ibaji alima tatembang amai asütsü. Iba ama kodamasü tia ajuruba ajanga sensakertem aika shirangdang azü metendangtet aser ultrasound-a magitet ta tapi agi mozü alia achiba ajanga temang tamajungba kümer arishi temdoker. Item shirangertem ajakji aneptsüba ser nung aser asüamajia mataloktsüba ser nung government mozü kidang taneptsü angutsüsa renema meyutsütetba ajanga atalokba takoksatem lir. Item tiaji jungjunga bilemdangra temulung ashitsüka aser temeim agi government mozükitemji jungjunga renemer yutsünütsüka bilemer. Tanübo, Nagaland nung government mozükitem tia ya reprangdangra, azü tendangba aser ultrasound reprangraba mapatem meinyaktetbajibo yutsür mozü ki aika nung Medical Officer mali tenüng agi mozüki lapokba angur. Ano, mozü ki aika nung Specialist alitsüba ser nung kata malinungji taneptsü bushia arur ajak tangaleni yoktsüsa akümer. Idangji, sensakertembo moutetter aser aoertema menur aoba agi len tom nung süadoker. Iba ama shilumanem mapang ayako tia ajurur asenok rongnung aika alitsü. Iba ama timtem tia nung nübortem ajak anitettsü asoshi government-i mozü ki lapok aser nisung ajak anema lidaktsütsü meranger. Ajisüaka, tanü asenok Nagaland tia reprangdangra sub-division-temji yutsür district headquaters nunga goverment mozü kidang sensakertem sen meindoki taneptsü angutsüsa renema maka. Shitakba agibo, government mozü kidangbo doctor tajungtiba den mozü aser chiyongtsü tajung angati angutsüla. Ajisüaka, nübortem shirangba mapang makamaityonga takar dang sendem nung sen apua bener private mozü kidangi taneptsü bushia aobaji sensakertem asoshi khuret tulu bendenloker aser government asoshi tamakok tuluka asütsü. Tanü govenrment mozüki mejungi akümba kuli bushidangra yimten yimsüsür, ketdangsertem aser doctortem dak tai aika angutsü. Yimsüsür aser ketdangsertemi mozü kitem tia mengudang ketdang asür aser shiranger anepluba mapaji senotsü ajangzüktsü atema masü saka temeim agi taneptsü agütsüba mapa ka ta mangatet inyaker. Ibayongji, doctortem aikati Kohima aser Dimapur totsür mounür, kechiyong idakjibo government mapa den repsema private nunga inyaktetter. Atangji, Kohima aser Dimapur nung govenment mozükidangbo doctor-tem aika lir saka parnok rongnung aikati private nung dena inyakba agi government mozükibo tongtibang masü ama kümdaktsür. Iba jagi meteta aser memeteti sensakertem aika timtem takoksa ajurur. Iba tiaji melenshidaktsünüba agi, taoba hopta nung asenoki Government mapa nung medical doctor-tem shianga private mozü kidang meinyak nunga koma süla (?) ta asüba tasüngdangba nung shisalemsatepogo. Iba tasüngdangba nung aikati government medical doctortemi senotsü talila aatsü memerangi akok tashi temeim agi angati taneptsü agütsütsübajiang merangteptsüla ta langzüogo. Alima nung takok tulutibaji shiranger ka aneptsübaji asütsü aser tepela tulutibajia shiranger ka aneptsüba nungi angur. Iba tepela aser temoatsüji meteta medical doctortemi talang nung alirtema dena tonga oagi taneptsü agütsütsü merangtsüla. Atangji, inyaker asoshibo taa lir saka taa talila bushidang makamaitertem tashidak makok aser mozü malitet südaktsüra, taa dang nungi tuluba  temerenshi angutsü !