Government nem tenla

Nagaland kümer joko küm roker jungdi asür saka gari lenmanga junga meyanglutet sütepa alidang, Ao Baptist Arogo Mungdang (ABAM) kübok aliba lim arogo shia nung temulunger tenla sen sarua Nagaland government nem sen lakh semer trok dak tali saruteta agütsübaji linük nung ajak asoshi otsüsütsü mapang tajung ka asütsü. Yashi tashibo arogo nungertemi anir department nung technical nisung tilatiba tashi agi government dak nungi mesükzüka agitsü aser achitsü dang bilema inyakogo saka tang ABAM ajanga asenoki gari lenmang yanglutsü asoshi government nem tenla sen agütsüba mapa yagi asenok ajak nem tangatetba tajung ka agütsüogo. Ano, tajung kaji ABAM-i tenla agütsüba sen enoksemer yanglutsüba tenemtsüng lenmang ya Ao lima kija ajangba aser Aortem kija jajatsüba lenmang ka masü saka Naga nunger ajak jajatsüba lenmang tongtibang ka akümtsüba lir. Atangji, ibai sen crore aika endoka inyaktsüba gari lenmang lir, anungji ABAM-i agütsüba sen mechimenuka jagi kechi inyaker, kechiang meinyak asütsü. Ajisüaka, iba senji sen dangbo masü saka yangji nübortem sarasadem, taginüba aser teyongyaba dena lir. Iba senjibo tenla kitem nung saruba sen lir. Iba sen jagibo sayatenya mapa inyaktsü. Joko, arogoi dena state nung gari lenmang yanglutsü asoshi tenla sen agütsüba mapa jagi government nung yimsüsür aser ketdangsertem ajak dang nübortem asoshi gari lenmang yanglutsüba maparen nung asenokiang enoksemer yanglutsüla ta tangatetba ka agütsür. Aji oda, lenmang yanglurtem danga nübortem asoshi gari lenmang yanglutsü dang asen lima asoshi tenla ka agütsür ama jungjunga yanglutsü nüngdakba indang shisalen ka teyur. Shitakba agibo, Nagaland asoshi lenmang tongtibangtibaji tenemtsüng lenmang (Fothill Road) ya asütsüba ser nung, ashiko, peiang magishi aser meperi asüba agi ajak külem anisüngzüktsüba gari lenmang atemabo shingaia temulung balaka magütsü südi. Joko, tangbo arogoi dena ajumgshia sarasademtsür külenang senotsü dena agütsür asünungji government-ia ano temulung tagütsüba inyaktsü imlar. Iba lenmang ya kangasa nüngdak asüba agi taoba küm anasemka jakdang nungi tenzüka Foothill Road Co-ordination Committee tenteta nübo, rongsen aser shisatsü tenlaba den ano nüngsen aser timtem lendonga aika tizükteta inyaka aruba angur. Mapang kabo government dang longkak aita senotsü meshiba tensa tia dena ajuruogo. Item ajakji nübortem anisüngzükdaktsünüba agi lir. Atangji, iba lenmang ya linük nung tongtibang lenmang tuluka asütsü asoshi sentong nungbo enoka lir, ajisüaka tang amai nübortemi majungshira, iba sentongji mataloktsü. Iba lenmang ya kodang junga lapoktetdir, asenok aika tenem nungi lenden bushia aluagi tajangzük aketba mapa tapu balala inyaka anisüngzüka alitsü. Iba lenmang yagi asenok nem Assam bandh asüdang timtem ajuruba alar tia nungi nüchiso agütsütsü. Joko, asenoka lenmang meyanglu ser yanglur ama aser yangluyonga mashimashika yanglutsür  tiyazü sen agizüka agiba tim masüba mapa nungi temulung meyiper ama, tangbo asenokiang tenla kidang temoatsü sentep nung ajak atema gari lenmang yanglutsü asoshi tensa sen sarua meshiteta sarasademer agütsür asünungji, asen lima renlokba nung kenyongi temelenshi tajung balaka arutsü imlar. Yashi tashi arogo aika mashilen nungi government teyari agia tenla ki yanglur alitsü aser jubileea monger alitsü. Itemji asenoksasa asen lima raksaba mapatem liasü ta asenok ajaki rajemdi aser tang nungibo mashilen nungi government teyari agia arogo mapa inyaktsü melen asenoki government nemang agütsüdi. Ibaji goverment kolak nung milong ajungloktsür amai asütsü.  Atangji, tetibo asenoki government nem senotsü teyari magütsütettsü, saka sarasadembo teti agütsütettsü. Aji oda, yimsüsürtem tenüng asangtsü aser arütsütsübaji arogo mapa lir ta arogo aser mungdang lenirtemi angatetdi. Akhi tejen putu nung ainkertemi aser Yisu alima nung alidang Paia yimten yimsüsürtem rongnung majungertem anema arütsüba aser metongshitsüba asenoki azünger. Tanüa parnok amaji inyaktettsüsa asenok dak tashi alitsü atema asenok indangindanga alitsüla.