Government school tem nung Handloom sü agi yangluba uniform amshitsü

Imphal, August 30 (Agencies): Manipur Minister of Commerce and Industry/ Handloom and Textiles Thongam Biswajit-i Mongolbarnü ashiba agi, Commerce and Industry department-i achaayanga taruba küm nungi government school tem nung handloom product tem uniform ama amshitsü atema State Cabinet matsüngdang benoktsü.
Paisa ashiba agi, state nung handloom nungi adokba süoshitem school tem nung uniform ama amshira iba ajanga state nung südakertem dang yariba masü saka rongsen ketsüng nung state tali renloktsü. Iba olen ya Biswajit-i Imphal East, Kongba Makha Nandeibam Leikai nung Imphal Handloom Building nung Handloom Readymade Garments, Show Room lapokba den külemi Foundation Day repa amongba mapang o jembidang ashi.
Iba amala shishilembadak lapokba ajanga mapa inyaktsü asoshi lenmang lapoktsür, ta pai ashi. Maneni minister-i ashiba agi, state nung pei sobaliba temeja aliba kin aika lir aser item kin tem ajak parnok indang handloom osettem ajungkettsüba aser wazüka ayutsüba temeden kar. Pai ashiba agi, Manipur nung südaker aika lir aser tangardang nungi Manipur indang handloom osettem khenyongi balaka lir.
Biswajit-i solar power looms indang tongtibang inyakyim rasaa ashiba den külemi iba amshiba ajanga mapang aser tashi kümzükba dang masü saka sü tali taktettsü aser sen timba aazüktettsü. Ministry of Micro Small and Medium Enterprises-i state atema solar looms 4000 agütsütsü asoshi nangzükba pai metetdaktsü. Iba dak sendakba nung loom 500 yakta agütsütsü, ta paisa shisem.
Biswajit-isa ashiba agi, sorkari Information Education and Communication Fund kübok scheme balala dak sendakba nung nüburtem nem Information and Public Relations ajanga osang agütsütsü. Foundation day amongba nüngtem nung Biswajit-i Imphal Handloom website lapoktsüogo.