Government tasenba

Tang Naga nunger o India government na tsüngda Naga yimten jenjang tasen ka latettsü asoshi jembiba ya shitak mapa küma kodang ao tenzükdir, idangji tang aliba government ya anentsüsa akümtsü aser mapang tatsüka atema government tasen ka akümtsü. Iba sülenang election agia tatartem shimtettsü aser item jagi government kümsük küm shitak bener aotsüsa government akümtsü. Küm 59 jakdang Naga lima ya Assam kübok lia Nagaland state angudang, mapang tatsüka atema Interim Body aküm aser parnoki state tasenba tenüng Nagaland ta jateta yimten yimsüsüba maparen tenzüka ooya alidangang, election agia shitakba state government nung shinükshibang ajak abensaa yimten yimsüsüba menden latet. Ibaji mesüka tanga India den Naga nunger yimten nüchiso bushir telok balala ajak külemi kodang sabang kati arur sign sütepdir, parnok telok shia nungi tetemsü nisung shimteta mapang tatsüka atema yimsüsüba menden nung mendaktsütsü. Atangji, India government mulungjang nung kechi bilemar, ibaji asenoki meshitetter aser Naga nungertemia shitakba tangatetetba ken o renemba nung kechisa zülua aliar mejangja nungji, Naga yimten tasen ka tenzüka aotsübaji kechi komaka  tenzüka aonungang tajungba asütsü ta shisalemsateptsübaji tang ya mapang shitak ka lir. Ashiko, India den Naga yimten ken o jembirtemibo terenem yua alitsüa akok saka asenok telok onsara nungji government tasen ka akümtsü tenzükdang telok balala rongnung menden raktep tenzük nungbo ta shisabolua bilemer. Atangji, temulung anisüngzük kaji, tang Nagaland Legislative Assembly nung temendak tatartemibo kodang Naga yimten tebilemtsü ya tatembang kati arua latetdir, idangjisa government tasen ka küma aotsü atema mena aliba menden mulungsua azüngtettsütsü ta tatar senden nung telemtetba agia lir. Aji oda, koba anogo nung India o Naga nunger linük tenzüker teloktem na tsüngda Naga yimten jenjang tasen ka latettsü asoshi sign sütepdir, idangjisa Nagaland yimten nunga temelenshi ka adoktsü. Naga yimten tebilemtsü onük benoka jembirtem bang nungi adokba o ajanga angatetba agi, Naga nunger asoshi yimten jenjang tasen ka latetaka, yimten nüchiso jenjangbo mangutsü, anungji tang amai India kübok state ka jenjang nung dang alitsü. Atangji, ano Naga nungertem yimten ka kübok alitsüsa alushia bener marutet nungji, Nagaland kidanger Assam, Arunachal aser Manipur nung alir Naga nungertem asoshibo Nagaland state kübok masü saka tang aliba pei pei state kübok yimten jenjang tajungba ka nung alitsüsa latettsü amai angazüker. Item tangatetba aser terenemba ajakji tapet aser tajung asütsü. Item ajakji timi benteta yimten maparen tasen tenzüka otettsü atema küm asem asoshi Nagaland State Advisory Council ang ka aküm nung tajungba asütsü südi ta bilemer. Iba Advisory Council nungji tang India den Naga yimten ken o benoka jembir teloktem den ano wadang balala nungi tetemsü nisung Naga kin shia nungi shimtet nung ajungtsü. Atangji, 1960 küm Nagaland state akümdangbo Nagaland government masü Assam government dang liasü, iba jagi Interim Legislative Body ka akümtsüsa aküm. Ajisüaka, tang aliba Nagaland state map ya memelenshii yimten jenjang ka latettsü asünungbo, Nagaland state government-bo lir asütsü saka nisunmg aser inyakyim dang kar melenshitsüsa adoktsü. Iba jagi Interim Body masü saka Interim Advisory Council-jiang tapetba südi sü ta bilemer. Iba dakji alaka kidanger state-tem nung Naga nunger alidak Naga nungertem nem yimten jenjang tasen ka agütsüba jagibo, item state-tem nung aliba government melentsüsabo makümtsü. Kechikoma yimya ka nung Nagaland yimten jenjang tasen ka lateta tenzükdir tenzükang, lanur putu asoshi mapang tajung ka tenzüker ta bilema telongjem aser tangatettep nung tenzüktsü merangtsüla. Iba sülen kodang election agia Nagaland tasenba maparen shitak bener aotsü tenzüdir, Naga nunger tashitemeteter, Tsüngrem aser nübortem meimba lanurtemi yimten tenzükbaji Tsüngremer nübortem tenzüker ta angateta tenzüktsü asoshi yimten nung shilem agitsüla.