Governor Acharya-i tzünglu tzü tatentsü ayongzüker

Dimapur, Rongchii (April) 25 (TYO): Tzü peria mangudang amshitsü aser tsünüsenbongtsü maparen ajungkettsü atema MGNREGA senotsü ajanga tzüngluruwa mapang tzü tadena ayuba mapa inyaktsüla ta Nagaland Governor PB Acharya-i ashi.
India Prime Minister Narendra Modi-i linük nung aliba Panchayat ajak dang tzünglu tatena ayutsü aser MNREGA senotsü ajanga tzü wazüka ayutsü tayongzükba ka agütsüogo, ta Governor-i ashi.
Tanü asenoki tzünglu tzü tatena ayutsüla. Rainwater harvesting system ya mapa tasak ka masü aser iba ajanga tajangzük aika angutsü, ta paisa ashi.
Acharya-isa University, NEZCC, Scouts & Guides, Red Cross, Ex Servicemen Association aser tanga mulungtet teloktem dang VDB tem den yaritepa pei pei yimtsüngtem nung osang prokshitsü ayongzük.
Nagaland Chief Minister Neiphiu Rio-i Rongchii (April) 24, 2018 nü Kohima nung State Level VDB & Village Council Conference nung teinyaktsü aika inyaktsü ashiba atema tenüngsang agütsür ta Governor Acharya-isa ashi.
Mapa timi meinyakba aser shitak meinyakba VDBs tem merenshitsü aser mapa tajung inyakba VDB tem nem sempet agütsütsü ta Chief Minister-i ashibaji kanga junger, ta paisa metetdaktsü.
VDB ajak nungi sorkar mapa inyakertem agientsü aser Nagaland nung aliba yimtsüng 1238 nungi non-government employee ka ka mapa inyakdaktsütsü lemtetba pelaa agizüker ta Governor Acharya-isa shisem.