Governor & CM nati ‘Vigilance Awareness Week’ amungba pela agizüker

Dimapur, October 29 (TYO): Linük den liromedema State Vigilance Commission, Nagaland-i October 30 nungi November 4, 2017 tashi “Vigilance Awareness Week” amungba atema kanga pelar, ta Nagaland Governor, P.B Acharya-i ashi.
Linük ka nung lokti, rongsenkettsüng aser yimten asoshi ochimashi ajanga lendong aser teraksa bener arutsür. Ochimashi indang teraji meimchir taginüba lir. India nung telatetba aika aliba, tax & license inyakyim tebenja aliba, sorkar department onsara aliba, ketdangsertem nem tashi kar alia agütsüba, sorkar rejutem madak ketdangser kari ketdangsüba aser tashishitsü maketba ozüngtem maliba ajanga ochimashi kanga bulua adoker, ta P.B Acharya-i sangdong ka nung metetdaktsü.
India kübok tesem aika nung ochimashi kanga bulur aser iba ya nokdangtsü atema longjemer mapa inyaktsüla. Mezüngbubaji asenoki nübortem tangatetba melenshidaktsütsüba lir. Nübortem dang ochimashi ajanga teraksa bener arutsüba aser lokti menentsüba indang osang tejangja sangdongtsüla. Talisa, Public dang welfare scheme balala tenzüktsüba nung parnok temeten alibatem metetdaktsütsüla, paisa ashi.
Ochimashi melidaktsütsü atema Department ajaki tashishitsü melii aser ochishia inyaksangshitsüla. Telok ajaki pei pei sasep nung ochimashi agientsü atema mapa inyaktsüla. Asen state nung Department temi e-govemance ajungketba aser RTI amshiba ajanga ochimashi agientettsü. Ajisüaka, nija ajangzüktsü atema RTI tim mesüi amshira, iba jagi teraksa ang talila bener arutsü, ta Governor-isa metetdaktsü.
Ochimashi anema inyakba nung State Vigilance Commission-i tongtipang shilem agitsüla. Iba Commission tsüngdang benoka aliba ken o tem asoshi ochi obendang agütsütsü aser ochimashi ketdangsertem aitsütsü aser ozüng tapet agi merenshitsü ta amanger. Ibaji ajanga ochimashi inyaktsü bilemba nokdangtettsü, ta PB Acharya-isa ashi.
Nagaland Chief Minister, T.R Zeliang-ia sangdong ka nung State Vigilance Commission-i Vigilance Awareness Week amungba atema pelar ta metetdaktsü.
“Ochimashi ajanga linük ka ainba nung tetsükdaktsü bener arutsür, sorkar senpong ajema kümdaktsür aser taruba o rongsen meputep kümdaktsür. Ochimashi ajanga terenlok mapa inyakba nung tetsükdaktsü bener arur” ta T.R Zeliang-i ashi.
Sensotem aser civil society züngsemtemi mapa inyakba ajanga inyaksangshi balala nungi ochimashi agientettsü, ta paisa shisem.
“Corruption Free India atema ozü sorkar indang alizüng nung, nübortem dang ochimashi anema osang prokshitsüba dena lir. Tia maka, asen loktiliba nung ochimashiji inyakyim tamajung ka ama masü saka taküm libaliro nung yimya ka ama dang züngshir. Tanü asen loktiliba nung ochishia alibaji akhi mapang inyakba ama aser tanü putu den meputep ama züngshir. Asenoki temelenshi bener arutsü atema ochishia aliba taküm ka ka akümtsüla” ta chief minister-isa ashi.
Vigilance Awareness Week mapang public awareness campaign aliba ajanga nübortem dang ochimashi indang temetettsü tali tejangjaba nung metetdaktsütsü imlar. Senso ajaki ochimashi anema inyakba mapa nung mulungsoa shilem agitsü ni ayongzüker, ta TR Zeliang-isa metetdaktsü.