Governor Ganesan-i anir “Shramdaan for Swachhata” inyak

September 30, 2023 nü Shramdaan for Swachha  Nagaland nung Governor La Ganesan-i Raj Bhavan compound nung kioktsü agi lenmang okdokdang agiba noksa ka angur.

Kohima, September 30, 2023 (PRO, Raj Bhavan): Prime Minister Narendra Modi-i October 2, 2023 nü Gandhi Jayanti jakdang linük ajungalen merükmeju mapa inyaktsü ayongzükba ama Nagaland Governor La Ganesan-i anir Raj Bhavan aser temeket merükmejua mongogo.

Tanü Governor Ganesan lenisüba kübok “Shramdaan for Swachhata” inyakogo.

“Merükmejuba ajanga temang nung tashidak aika nungi kümzüker aser merükmejuba ya temeshi süa aliba sülen lir. Anungji nisung ajaki tashidak balala nungi kümzüka alitsü atema pei pei kidang, temeket aser yimdong nung merükmeju mapa inyaktsüla” ta Ganesan-i ayongzük.

“Tanü asenoki lokti merükmejuba mapa inyakba ya sentong ka dang saka asenok ajaki pei pei taküm liraliro nung merükmejua alitsü merangdi” ta paisa ashi.

Iba sentong nung Secretary to Governor, Rajesh Soundararajan, Raj Bhavan ketdangsürtem aser staff, security personnels, Kohima DC Shanavas, KMC Administrator aser ketdangsürtemi shilem agia liasü.