Governor-i anir telok balalai Moatsü salem abener

Dimapur, May 1 (TYO): Nagaland Governor PB Acharya-i Aor dangi Moatsü benjung salem metetdaktsü.
Moatsü benjung ya metsü prokba sülen amunger aser iba mapang ya alu mapa nung anibelemba sülen temulung sadoka aser anisüngzüka kazür. Moatsü benjung nung ken atener aser tsüngsanger aser Tsüngrem dang Pa temeim aser temoatsü atema tenüngsang agütsür, ta Acharya-i ashi.
Nagaland nung alirtemi ajaki pei sobaliba kümzüka ayutsü aser ajungkettsüla aser benjung amunga ajanga lokti nung telongjem adokdaktsütsü ayongzüker, ta paisa ashi.
Moatsü benjung ajanga Aor asoshi dang masü saka Naga nunger ajak nem yimjung, telongjem aser azükaru bentsür arung ta moatsür, ta Acharya-isa metetdaktsü.
Maneni, Bharatiya Janata Party (BJP) Nagaland State aser United Naga Democratic Party (UNDP) Nagaland teloktemia sangdong balala ajanga Moatsü benjung salem metetdaktsü.
Moatsü benjung ajanga Aor nem dang masü saka Naga nunger ajak dangi yimjung, teputep, taremzüktep aser telongjem bentsür arungma, ta BJP-i ashi.
“Ao lima nung Khristan yimsü aruba sülen Moatsü benjung tetezü taketba kümdaktsü” ta UNDP President N. Hotongse Sangtam-i ashi.
Aori mezüng Khristan yimsü aser shisaluyimba agizük aser parnoki amalitepa yaritepba ajanga foreign missionary temi Nagaland ajungalen parnok tesayubatem prokshi. Anungji, Nagaland nung mezüngpurtem- asür T.Aliba lmti Ao, Naga National Council lennir asür Dr. Imkongliba Ao aser Nagaland nung mezüng Chief Minister asür P.Shilu Ao nunger ama takotet lennirtem adok, ta paisa metetdaktsü.
Talisa, Aortemi ENPO tesemtem nung shisaluyimba, lokti aser tamangba tsütsü teyari tulu agütsü, ta UNDP President-isa shisem.