Governor-i bank kongsangtem lapoktsü ayongzüker

Dimapur, Rongchii (April) 27 (TYO): Nagaland Governor, PB Acharya-i Nagaland Rural Bank, Nagaland State Co-operative Bank Ltd, UCO Bank Central Bank of India aser United Bank of India tem dang jila nungi pilar aliba tesemtem nung bank kongsangtem lapoktsü atema shiditem züluogo.
Governor Acharya-i Managing Director aser CEO tem dang pai bank manager tem den ajurutepogo aser Nagaland kübok district ajak nung kongsangtem lapoktsü atema ayongzükogo ta shia lir.
Kohima aser Dimapur dak alaka tanga District tem nung bank kongsangtem peria lapoka mali. Jila nungi pilar aliba tesemtem nung alirtemi bank dak sendakba maparen aser ajanga bank ajanga scheme balala teyari agütsüba osang memetet, ta paisa shidi nung zülua lir.
Tsüklai (February) 9, 2018 nü Governor Acharya-i Raj Bhavan Kohima nung Bank balala nungi teshimtet nübo 20 den ajurutepa senden ka amen aser parnok rongnungi bank 5-i tanga district tem nung kongsangtem lapoktsü mulunga agizükogo.