Governor-i DAN sorkar nem tenüngsang agüja jembi: TR Zeliang

Kohima, Metsüremi (March) 24 (TYO): Governor P B Acharya-i Assembly nung jembiba onükji taoba sorkari inyaktetbatem indang liasü ta Nagaland Assembly nung Opposition lennir T R Zeliang-i ashi.
Metsüremi (March) 22 nü Governor-i jembiba onük nung gari lenmang aser tongtipang terenlok mapatem ashibaji taoba sorkari inyakbatem liasü aser sorkar taseni item mapa agizüka inyakba atema NPF-i pelar ta TR Zeliang-i ashi.
“Taoba mapang NPF-BJP teloktep aser tang NDPP-BJP teloktep tsüngda tebendang tulu lir. NPF-i BJP den election tembangba sülen ang teloktep yanglu saka NDPP-ibo election magidang yongi BJP den menden lemsateptsü atema tenangzükba agiteper teloktep yanglu. Talisa, BJP-i cabinet menden teimba nguogo, anungji PDA sorkar ya BJP asü mesüra NDPP-i anir’ar onoki ratar” ta paisa shisem.
“Naga nungertemi NPF-BJP teloktep aser NDPP-BJP teloktep tsüngda tebendang aliba jungjunga angatettsüla” ta paisa metetdaktsü.
ECI aser CEO Nagaland, police aser administration-i election tiptema agidaktsüba atema TR Zeliang-i tenüngsang agütsü saka paisa election nung aser süir külena nisung taküm kar laluba aser aika yirutsüba atema sasa bilemba metetdaktsü.
Arogotem, kin hoho tem aser NGO temi Clean Election Campaign inyakba atema paisa tenüngsang agütsü. “Iba mapa ya takok junga mongutet saka tangatetba tajung yur inyakba atema tenüngsang agütsür” ta paisa shisem.
Tsüklai (February) 27 nü Electronic Voting Machine (EVMs) majungba ajanga polling station aika nung vote agütsütsü asoshi mapang agi meperi. EVM ajanga mapa shitak meinyakteter anungji asenoki EVM melena paper ballot system amshitsü atema telemtetba ka agitsüla, ta Opposition lennirisa ayongzük.
Tening Assembly Constituency nung RO-i candidate ana nem takok anguba kulikakettem agütsübaji tesüngmangtsüka lir aser iba ya ajanga kulikaket tanabuba dak temulung melemteter. ECI, CEO Nagaland aser RO Tening-i tim mesüi inyakogo aser linük putiotsü nung tang mezüng atema iba ya atalokogo, ta TR Zeliang-isa ashi.
PDA sorkari “Terenlok arudar” ta asüba yimyim atema Zeliang-i “temelenshiji arudar ta masü saka sorkar kümtetba anogo nungi aruogo. Metsüremi (March) 8 nü Local Ground Kohima nung agiba sentongji tenangzükba agiba sentong ka masü saka tenüngsang agütsüba sentong ka ama liasü” ta paisa shisem.
Parnoki sorkar tang ang kümtet anungji telangzüba magütsütettsü ta ruling MLA temi tatemtsü amba atema TR Zeliang-isa “anogo ka mesüra ana danga süang, sorkari telangzüba agütsütsüla” ta ashi.
NDPP motto “Facta non verba” ya Kohima nung nija school ka nungi auyazüka amshiba lir. PDA sorkari common minimum programme ano meyanglu aser iba ajanga PDA sorkar ya alizüng maliba sorkar ka aser parnoki tangatetba kecha melii dang sorkar tashi angutsü atema inyakba liasü ta kuli sayur, ta taoba chief minister-isa aitsü.
Governor-i Luchii (December) 1, 2016 nü Nagaland Vision Document 2030 sayatsü saka tia maka tanü pai jembiba onük nung ibaji meshisem, ta paisa ashi.
Naga yimten latettsü atema inyakba mapa nung PDA sorkari tenokdangba kecha magütsütsü ta Governor-i ashiba atema TR Zeliang-isa “Naga yimten latettsü atema telemtetba ka agira, Chief Minister-i pa menden toktsütsü mulunga lir asü mali?” ta asüngdang.