Governor-i Doyang Hydro Electric Plant semdang

Dimapur, November 9 (TYO) : November 8, 2016 nü Nagaland Governor, P.B. Acharya-i Wokha district kübok Doyang Hydro Electric Plant (DHEP) semdang aser idakji aliba ketdangsertem den ajurutepa sensaksem.
Iba mapang General Manager (C)/Head of Plant, D.S. Rai-i ashiba agi, 2016-17 atema Doyang Hydro Electric Plant (DHEP) alizüngji 227 million units liasü aser tang tashi nung electricity 222 million units adokogo.
November, 2016 tatemlen tashi nung DHEP-i alizüng tongteta inyaktsü saka gari lenmang majungba aser internet connectivity maliba ajanga tetsükdaktsü tulu ajurur anungji iba atema Governor nem mapa inyakdaktsünür, ta D.S. Rai-isa ashi.
Senden nung P.B. Acharya-i ketdangsertem nem tenüngsang agütsü aser paisa gari lenmang ajungba den internet connectivity maliba khurettem atema mapa inyaktsü ta nangzük.
Iba mapang Nagaland Governor-isa Vivekananda Kendra Vidyalaya (NEEPCO) Doyang nung tesayurtem den ajurutep.
November 7, 2016 nü pa Doyang tonga aruba mapang kaketshirtemi sobaliba sentong ka ayongzüka agi aser School Principal, Lukumoni Borthakur-i pela agizük.