Governor-i Durga Puja aser Dussehra salem abener

Dimapur, Mongputeni (October) 16 (TYO): Nagaland Governor PB Acharya-i Nagaland nung alirtem den Durga Puja aser Dussehra benjung salem metetdaktsü.
Maa Durga ya nisung teimba kati külemba Shakti lir. Durga tetezü ya ajuruteptsü asakba dang ajar, saka la alima tetsü asü nung, la dak temeim, rongsen, tashi, topur aser sempet tajung ajak lir, ta Governor Acharya-i sangdong ka nung ashi.
Iba benjung ajanga temenen ajak anema raraba aser temeshipurtemi temenen madak takok anguba tamaitsü sayur, ta paisa ashi.
Durga Puja aser Dussehra ajanga loktiliba nung yimjung, azükaru aser putepa alitsü tamendakdak yangertsü aser asenoki tangatetba tajung lenmang nung jajatsü atema ajungmesotsü imlar, ta Acharya-isa shisem.
Paisa nübortem dang Mother Durga külemtsü aser Durga Puja aser Dussehra benjungtem pelatepa amungtsü atema ayongzük.