Governor-i PDA sorkar dak temulung malemer: NPF

Dimapur, July 6 (TYO): NDPP-i sangdong agütsüba ka July 6, 2020 osangkakettem nung adokba nung onük tajung ka dang maliasü anungji tazüngertem mapang endokba dang asütsü, ta Naga People’s Front (NPF)-i tanü metetdaktsüogo.
“NPF-i PDA sorkar aser Governor tsüngda tesentaktep raksatsütsü meranger ta NDPP-i ashitsü nüngdak mali kechiyong Governor-i tang aliba state sorkar dak temulung malemer. Governor-i dang masü saka public-ia PDA sorkar dak teimla kecha mali aser temulung malemer,” ta Press Bureau, NPF sangdong ka nung ashi.
“PDA sorkari Governor nem telangzüba agütsüba nung August 3, 2015 Framework Agreement aser October 31, 2019 nü yimten olemtep tembangba indang aiben shia lir. Iba kasa onük ya NDPP-ia tetshiogo aser parnoki iba mapa ana ya inyaktetba ama jembir. August 3, 2015 Framework Agreement sign sütepbaji NPF-i aniba DAN sorkar mapang liasü. October 31, 2019 nü yimten olemtep tembangba mapanga NPF teshimtet telok ka New Delhi nung hopta ana shi mongzüka NSCN (IM) aser NNPGS den osang agitepa liasü. Anungji, PDA sorkar aser NDPP-i item mapa ana nung shilem kecha magi ser tenüng agitsü merangbaji temenünütsüka lir,” ta NPF-isa metetdaktsüogo.
PDA sorkarisa COVID-19 wara ajanga tangalen nungi arur nisung meyirjang aika nem health care, chiyungtsü aser tanenzükdak agütsüogo ta Governor dang shiogo. Ajisüaka quarantine centre tem nung amongertemi temulung masüba onük meyirjang aika agütsüogo. Külen, Tuensang tatalokba ajuruba sülen sorkari Chief Secretary-i aniba state co-ordination committee on COVID-19 anentsür CM aser Dy. CM na convenor o co-convenor ser telok tasen ka tentetshi. Saka Jalukie nunga atalokba ajanga state sorkari iba wara azüoktsüba mapa shitak meinyaktetba sayuogo, ta NPF-isa tai tongloktsü.
PDA sorkari temzüng-ozüng dak sendakba mapa meinyakteter anungji iba sorkari ketdangsüa aotsü temeten mali anungji anentsüla, ta parnokisa takhangba agütsü.