Governor-i PM Modi dang teyari meshir

Dimapur, Luroi (August) 4 (TYO): Nagaland Governor, PB Acharya-i Prime Minister Narendra Modi dang Nagaland nung tzünglu kanga aruba ajanga lendong balala atalokba indang osang metetdaktsüogo.
Alima lendong balala atalokba ajanga nübortem tim atemer anungji Centre sorkari teyari agütsütsü mepishir, ta Governor-i Modi dang ashi.
State sorkari akokba tashi infrastructures raksabatem yanglutsü merangdar aser relief & rehabilitation mapa inyaker. Ajisüaka, state sorkar ket nung senotsü, kol aser osettsüset peria maliba den connectivity majungba ajanga khuret mokokteter, iba jagi Centre sorkar teyari nüngdaker, ta paisa ashi.
Governor Acharya-isa Prime Minister dang anentsüh aluba nungi ali anenoka aiba, tzü metsüng den tzü atsüngdenba lendong balala nung nisung takümtem samaogo aser kiojen aika raksatsüogo ta ashi.
Anentsüh tulu aluba aser ali anenzüka aoba ajanga district aikati moutettsüsa lenmangtem noktanga lir aser power supply lines, communication networks ama tang nüngdakba facility raksaogo. District headquarters-i tang nüngdakba achiajemtsü aser osettem bener mouteter, ta Acharya-isa ashi.
Tanü Governor-isa Kiphire district nung lema agütsütsü atema jang, dal, totzü, chini, mamatzü aser süngojok nungertem bener yoktsü atema agütsü.
Governor-i bener yokbaji Kiphire District Administration ket nung agütsütsü.
IAF helicopter ajanga belener
Nagaland kübok anentsüh timtem ajanga gari moutetba tesemtemi Indian Air Force (IAF)-i tayimtsü ajanga essential commodities agütsür.
Tanep IAF helicopter temi Peren district kübok Tening-i anaben tashi essential commodities tonne 1.5 bener ao. Ajisüaka, tsüngsang majungba ajanga tanüngba tesemtemibo bener moutet.
Rijiju aser Rio nati Kiphire semdangtsü aliba atema senden amen
Asüng Union minister of state for Home Kiren Rijiju aser Chief Minister Neiphiu Rio nati semdangtsü aliba dak sendakba nung tanü Kiphire district administration-i Head of Departments, HODs den rongdak senden ka ayonga amen.
Senden nung SDO Civil Reny Wilfred-i HoDs dang Rijiju aser Rio nati semdangdang tasüngdangbatem langzütsü atema alitsü metetdaktsü.
Tenati semdangbaji Aspirational District Status aser alima lendong atalokba atema asütsü akok, ta paisa shisem.
Senden nungsa Independence Day dak sendakba onüktem lemsatep aser idangji SDO Civil Longtiba-i lendong balala alatokba ajanga iba atema senden ayonga mementet ta ashi.