Governor-i Rio CM inyaktsü shim; Mar 8 nü tenangzükba agitsü

Kohima, Metsüremi (Mar) 6 (TYO): Nagaland Governor, PB Acharya-i tanü chief minister tasen inyaktsü atema Neiphiu Rio shim aser pa lenisüba kübok sorkar tasen akümtsü atema temelaba agütsü.
Governor-i Neiphiu Rio dang Metsüremi (March) 16, 2018 anogo mesüra matongdang pa ket nung sorkar akümtsü atema nübo peria aliba sayutsü metetdaktsü.
Governor Acharya-i Rio dang, BJP MLA 12, JD(U) aser Independent MLA ka ka den NDPP MLA temi pa pusema nungitba shiditem nguogo, ta ashi.
Iba nung ajemdaker Governor-i Metsüremi (March) 8 anepdang 11:30 ako nung Local Ground Kohima nung Council of Ministers nem tenangzükba agidaktsütsü.
Governor Acharya-isa tanü Chief Minister TR Zeliang aser pai aniba council of ministers-i menden yutsüba shidi agizük.
Ajisüaka, Governor-i TR Zeliang dang sorkar tasen ka maküm tashi office metoktsüi atatsü atema mepishi.
Election Commission of India ketdangsertem den Chief Electoral Officer, Nagaland, Abhijit Sinha nungertemi Nagaland Governor nem 13 buba Nagaland Legislative Assembly kümtetba indang tezüluba agütsü aser iba sülen pai 12 buba Nagaland Legislative Assembly anentsü.
Tanü Union Minister for Health and Family Welfare, Jagat Prakash Nadda den BJP national General Secretary Arun Singh, BJP MLA tasen 12 aser BJP State President BJP Visasolie Lhoungu nungertemi Governor den ajurutep aser Neiphiu Rio lenisüba nung sorkar tasen akümtsü pusema nungiter ta asüba kuli agütsü.
13 buba NLA nung BJP Legislature Party leader inyaktsü atema Y Patton shimogo ta parnokisa Governor dang ashi.
Ano, National Peoples’ Party (NPP) Nagaland President, Ato Yepthomi den NPP MLA aser General Secretary NDPP, Benjamin nungertemia NDPP-BJP Chief Ministerial candidate Neiphiu Rio pusema nungiter ta Governor nem shidi ka agütsü.
Ajisüaka, Governor-i State NPP dang parnok National President aser MLA anapronglai sign asüba kulitem tekaratiba nung agütsütsü tetuyuba agütsü.