Governor-i tatar senden ayongzükdaktsüner; Chief minister-i memulunger

Kohima, Jul 12 (TYO) : Nagaland Governor P .B Acharya-i yashi Chief Minister Dr Shurhozelie Liezietsu dang pa dak tatartem teimbakati temulung lemteta ali asü maliar reprangdangtsü asoshi July 15, 2017 tashi nungbo tatar senden ayongzüktsüla ta metetdaktsü saka chief minister-i tang tatar senden alitsübaji menüngdaker ta metetdaktsüogo.
Governor-i chief minister dangi tatar senden alitsü asoshi züluba shidi nung ajemdaker, Nagaland Speaker-ia tatar sendenji Governor den jembiteper July 14 mesüra 15 nung ali ajungtsü ta chief minister dangi shidi ka yoka liasü.
Taoba chief minister aser tang MLA T.R.Zeliang-i governor dang pa den Nagaland tatar senden nung tatar 60 rongnungi tatar 44 lir, anungji pai aniba government kümdakjang ta shidi ka agütsüba nung ajemdaker governor-i Chief minister dang tatar senden ayongzüktsü asoshi metetdakja liasü.
Ajisüaka, yashi cabinet senden ka mena yangji iba ken o süoka jembir külen, tatar senden ya governori pa mulungka nung jateptsü mesüra anentsütsü makok, kechiyong chief minister aser pa den külem council of ministere-i senden ali junger ta governor dang ashi nung dang pai senden ayongtsü akok ta temzüng nung shia lir aser kasaji Supreme court-ia obendang ka agüja lir ta metetdaktsü.
Iba kasaji Arunachal nung ataloka lir ta paisa metetdaktsü. Arunachal nung taoba küm governor-i pa mulungka nung tatar senden jatepbaji tai liasü, kechiyong governor nem tatar senden ayongtsü aser anentsütsü tashi agüja mali ta Dr.Shurhozelie-isa metetdaktsü.
“Governor-i Chief ministeri aniba Council of Ministers-i ashiba nung dang aotsü temzüngi melaa lir,” ta Dr Liezietsu-isa metetdaktsü. Anungji, tang tashibo Council of Ministers-i Governor dang tatar senden ayongzüktsü shia maka nungji, tang July 15 tashi nung tatar senden ayongzüktsübaji nüngdak madoker ta paisa metetdaktsü.
Ano, tanü Speaker, Dr.Imtiwapangi chief minister dangi züluba shiti nung, “temzüngi shia aliba ama, governor-i tatar senden ayonga arur asünungji, pai ashiba ama senden ayongtsüba osangji nü dangi yokogo, anungji nai imlibilema, speaker office-bo yimten telok shinga tsütsüa atsünga meinyaktsü asünungji, governor den asüngdangtepa inyakdaktsüner,” ta metetdaktsü.
Yashi Cabinet senden nungsa, tang NPF tatartem rongnung mepetmesü adoka lenir melentsü ken o adokbaji NPF telok tebilemtsü lir, anungji assembly nung masü saka NPF senden nung dang lemtettsü ta lemteta liasü. Tang tashibo NPF telok nung telemsa adoka mali, anungji NPF teloki Chief minister, Dr.Shurhozelie-i aniba council of ministers dak temulung lemteta dang lir ta parnokisa metetdaktsü.
Tang T.R.Zeliangi anir Kaziranga nung alirtem rongnungji parnok ter suspend sütsüaka, tang tashi parnokji NPF purtem lir, parnokji assembly nung yimten telok tasen ka masü, anungji parnoki governor dang tatar senden ayongzüktsü asüngdangtsü makok ta Dr.Shurhozelie-i aniba council of ministers-i metetdaktsü.
Ibaj dang masü saka tan ita July 29 nung Northern Angami Assembly constituency nung bye-election nung tokteptsü asoshi Chief minister, Dr.Shurhozelie tenüng agüja lir aser Election Commission ajanga ‘Code of Conduct’ agüja lir, anungji iba election matem tashibo cabinet-i governor dang tatar senden ayongtsü ashitsübaji shitak masütsü ta parnokisa metetdaktsü.