Governor indang onük atema ruling aser opposition o atsütep

Kohima, Metsüremi (March) 24 (TYO): PDA sorkar kübok 13 buba Nagaland Legislative Assembly mezüngbuba session agidang tanü Governor P B Acharya-i jembiba onük atema o atsütepba mapang agi.
PDA sorkari coffee plantation, gari lenmang, organic farming dak denakba mapa inyaktsü metetdaktsüba atema Opposition MLA temi pela agizük saka item ajakji taoba sorkari atongteta inyakabatem dang lir ta ashi.
Metsüremi (March) 6, 2018 nü Governor P B Acharya-i sorkar tasen kümtetra ita trok tsüngda nung Naga yimten latettsü ta ashibaji mapa küma inyaktsüla. Aji ta mesüra, iba olenji NDPP-BJP sorkar kümdaktsütsü atema Naga nunger anisatsü merangba onük ka ama züngshitsü, ta MLA Y Vikheho Swu-i ashi.
Swu-i Road & Bridges Department nung minister inyakba mapang ajangshia aruba indang metetdaktsüdang, “Nagaland nung gari lenmang majungbaji khuret tulu ka masü saka Road Maintenance Policy maliba ya ang khuret tuluba lir. Ano, department ket nung aliba tim mesüi amshiba ajanga khuret tulu kümdaktsür” ta ashi.
PDA sorkari gari lenmangtem anepalutsü atem sen crore 50 lemzüktsübaji kanga ajemra kechiyong küm shia gari lenmangtem jungjunga anepalutsü atema sen crore 350 shi nüngdaker, ta paisa shisem.
“Onoki opposition nung amentsü mapang ka ajurudang, sorkar tasenba nem sen crore 1040 alangba gari lenmang mapatong 33 tashi agütsüogo” ta Swu-isa metetdaktsü.
South Africa nung Cape Town tonga Nagaland Coffee aoba indang onük atema Swu-i Land Resources Department dang iba maparen asentenshia inyakba atema pelaba metetdaktsü. “Coffee Plantation project asentenshia inyaktsü shisatetbaji taoba Chief Minister TR Zeliang liasü” ta paisa ashi.
Maneni opposition MLA Y. M. Yollow-ia ashiba agi, Naga nungertemi mapa meranga inyakba ajanga masü saka zübazüba dang sen aginür, anungji sorkari mapa inyaktsü yimya sübadaktsütsüla.
Sorkari Kohima aser Dimapur district dang masü saka tanga tesemtem aser meta talang pilar aliba tesemtem asoshia bilemja mapa inyaktsüla, ta Yollow-isa shisem.
Governor-i onük jembiba nung tasen kecha maliasü aser sorkari welfare policy aser program tasen ka dang mebendenlok ta Dr Chumben Murry-i ashi.
Sorkari Opposition züngsemtem indang constituency tem asoshia kasa bilemba inyaktsüla ta paisa ayongzük.
PDA sorkari NPF indang 2013 election yimyim “Peace for development, Development for peace” amshiba atema Dr Chumben-isa sorkar aitsü.
Neiphiu Rio aser taoba MLA Dr Neiphrezo Keditsu nati election nüboyimba mapang NPF tetshiogo, anungji NDPP dak langka tai keta lir ama bilemer. Anungji, NDPP MLA temi dang mulungra, NPF-i 50:50 tangatetba nung lemsar sorkar ketdangsüba nung yariteptsü mulunga lir, ta Dr Chumben-isa metetdaktsü.
Opposition MLA Amenba Yaden-ia Centre for Peace and Non-Violence tentettsü melena tanga tenteta aliba Forum for Naga Reconciliation ya ang tashi itshi nung ajungtsü ta tebilemba ka lemsatep.
MLA B S Nganlang-i sorkar dang VIP sobaliba agientsü atema name plates aser beacon lights mamshitsü telemtetba agiba khen meyipa reprangshitsü atema ayongzük.
Gari nung name plate aser beacon light mamshiba ajanga meta talang pilar aliba tesemtem nungi MLA temi Assam adena Kohima-i arudang timtem ajurutsü, ta Nganlang-i ashi.
Linük nung Khristantem anema mapa inyakba maparen atema opposition-i aitsübaji ruling MLA temia pusemer saka item mapaji BJP-i inyaker ta asübaji magizüker, kechiyong BJP-i iba mapa inyakba kuli kecha mali, ta MLA Kikon-i ashi.
Taoba sorkar mapang NPF-i BJP den tesentaktep liasü aser taoba Chief Minister Zeliang-ia BJP central lennirtem den aiben ajurutep saka pai Khristantem dak tashiyim mapa inyakba atema khen danga ola madok, ta Kikon-i NPF aitsü.
Tanü o atsütepba mapang tang mezüng atema MLA inyakertem- Temjen Imna Along, K Tokugha Sukhalu aser Toshi Wontung nungertemia shilem agi.
Sorkar taseni gari lenmangtem yanglushitsü aser tensa tajungba kümdaktsütsü. Ajisüaka, opposition züngsemtemi PDA sorkar inyaksangshi atema obendang magütsüi atatsüla kechiyong onoki sorkari kümteter anogo ishika dang süiogo, anungji temelenshi bener arutsü atema ata liang, ta Minister, Temjen Imna Along-i ashi.
Paisa, Padma Shri Award angur M Piyongtemjen Jamir nem tenüngsang agütsüdang, Speaker, Chief Minister, Opposition lennir aser züngsem ajak den Hindi aser Urdu oshitem ajanga jembi.
NDPP-i aniba PDA sorkari temelenshi bener arudar aser ibaji taoba opposition maliba sorkari minute 15 atema dang assembly session agiba ama magiba ya ka lir, ta MLA K T Sukhalu-ia ashi.
Chief Secretary’s Welfare Fund atema anogo ka indang itasen agizükba atema Sukhalu-isa ashiba agi, iba telemtetba ya sorkar taseni masü saka taoba sorkari agiba lir.
PDA sorkari Hindu nunger tali bilemloka aoertem den tesentektap kecha mali aser sorkari Naga nunger tamangba, sobaliba aser ozüngtem kümzüka ayutsü ta MLA Toshi Wontung-ia ashi.
Tanü senden nung Chief Minister Neiphiu Rio aser par cabinet züngsem 4-i sorkar department 18 indang annual administrative report (2017) metetdaktsü.
Chief minister-isa Juvenile Justice (Care and Protection of Children) Rules, Department of Social Welfare benok aser Deputy Chief Minister Yanthungo Patton-i Nagaland Societies Registration Rules, 2017 benoka liasü.