Governor PB Acharya-i Tsungremong aser Naknyulüm salem metetdaktsür

Dimapur, Chiteni (July) 31 (TYO): Nagaland Governor PB Acharya-i Aor aser Chang nunger den Tsungremong o Naknyulüm benjungtem salem metetdaktsü.
Tsungremong benjung ajanga alu nung metsü prokba tembangba tamaitsü sayur. Iba benjung nung Aortemi Tsüngremi meimba aser moatsü atema pelatsüla, ta Governor Acharya-i sangdong ka nung ashi.
Paisa benjungtem amungba ajanga sobaliba aser inyaksangshitem kümzüka ayutsü aser ajungkettsü atema ayongzük.
“Tsüngremong ajanga lanuputu aser yimdaklirtemi parnok sempet aser tashi sayutsü atema maongka agütsütsüla. Tsüngremong ajanga Aor dangi dang masü saka Naga nunger dangi yimjung, telongjem aser azükaru bentsür arujang ta moatsür” ta Governor-i ashi.
PB Acharya-isa tanga sangdong ka nung Chang nunger den Naknyu benjung salem lemsatepdang, iba benjung ajanga tesangwai tammang akokba tamaitsü sayur, ta shia lir.
Iba benjung amungba ajanga nübortem angatetteptsü aser loktiliba nung temenentem samatsütsü ayongzüker, ta paisa ashi.