Governor Prof. Jagdish Mukhi den tepila sentong agi

Nagaland Governor menden yutsüsang Prof. Jagdish Mukhi, pa kinungtsü First Lady, Prem Mukhi, Nagaland indang taoba chief minister S. C. Jamir, Chief Secretary J. Alam, IAS, sorkar ketdangsür aser tongtipang nisungtem Imkongliba Ao Hall, Raj Bhavan, Kohima nung February 17, 2023 nü tangokba noksa nung angur.

Dimapur, Tsüklai/February 17 (TYO): Nagaland indang Governor menden nungi alusang Prof. Jagdish Mukhi den tepila sentong ka Dr. Imkongliba Ao Hall, Raj Bhavan nung February 17, 2023 nü agia liasü. Iba sentong nung First Lady Prem Mukhi, Nagaland indang taoba chief minister S. C. Jamir, Chief Secretary J. Alam, IAS, sorkar ketdangsür, Raj Bhavan nung ketdangsür aser staff tem aser tongtipang nisungtem dena liasü.

Governor, Prof. Jagdish Mukhi ya Nagaland indang Governor ka ama September 17, 2021 nung shima liasü aser pa state nung alidang nüburtemi akumtsüboa amshiba, temeim sayuba aser yaritepba atema pelaba lemsatep.

Pai Nagaland indang Governor tasenba La Ganesan den salema pa dak tamang katetba ashi aser pai linük aser Naga nunger ajungtsü asoshi meja-meja, tashi ita aser yimya shidak amshia len anitsü, ta ashi.

Pai Raj Bhavan ketdangsür aser staff tem nem tenüngsang agütsü aser parnoki amalitep makaibo kecha nunga takok mongutetla, ta ashi.

Nagaland indang Governor inyaktsü mapa talila agizükba bilemteta jembidang, pai mapa tuluka agizüker, kong nendaka inyaktsü aser institutional capital wazüka ayutsü nüngdak ta angateta liasü, ta Prof. Mukhi-i ashi.

Pai state tesem ajunga sema jajadang nüburtem den ajurutepa sensaksem akaba ajanga pa ajungmeso aser tashi itdaktsü aser lokti ajunga nungi pa nem temoatsü agütsü aser yaritepa liasü, ta ashi.

Ochimashi maparen ya terenlok aser junga yimsüsütsü asoshi tsükchir ka lir, anungji sorkar aser nüburtem lungjemer linük nükjidong nung takok angutsüla, ta pai ayongzük.

Paisa legislator, heads of departments aser staff ajunga dang pelaba lemsatepa liasü.

Commissioner, Nagaland, T. Mhabemo Yanthan, IAS ajanga iba tepila sentong nung jembidang, Commissioner & Secretary to the Governor ka ama alidang Governor Mukhi den külemi inyakshiba ya maongka tulu liasü, ta ashi.

Prof. Jagdish Mukhi-i state tesem ajungalen sema jajaogo, nüburtem ajurua sensaksema liasü, ta pai ashi.

Pai international border anüker aser nüburtem ajungmeso, ta ashi.

Aluyimba, tetsür temeden, lanur entrepreneurship aser tesendaktep tsütsü pei sasa pei peria alitsü angdonger ka ama Prof. Mukhi liasü, ta Yanthan-i ashi.

Temelaba makai ozüngi memelaba check gate tem pa office mapa agizükli tasü ita shibangtsüba atema tenüngsang agütsü aser iba yongji state nung shishilempar khuret ajema kumdaktsü, ta Mhabemo-i tenüng sanga liasü.

State sorkar tenüng nung jembidang, Governor ka ama küm ka-ser tesadang inyakba ya tereprangtsübo tilaka lir, saka pai lenla ajunga nung temelenshi jenti bener arutsü, ta Chief Secretary, J. Alam, IAS ajanga ashi.

Pa indang shisatsü, ajangshia aliba aser senotsü tsütsü pa shisatsü ya state tashi aitba tsütsü len sayur ka ama liasü, ta ashi.

Dimapur aser Kohima tsüngta 4 lane lenmang yangluba amala project tem tekeraba nung inyakdaktsüba asoshi Chief Secretary-i Governor nem tenüngsang agütsü aser pai temolung agüja mitba yong tajangzük jenti nguogo, ta ashi.

Sentong temer pa Assam-i aotsü lia Assam Rifles Helipad, Kohima nung Nagaland Police ajanga rashtriya salute agüja liasü.

Anepdang Nagaland Chief Minister Nephiu Rio aser pa kinungtsü nati Governor Prof. Jagdish Mukhi aser pa kinuntsü ajurua liasü.