Governor Ravi-i Nagaland nung NHIDCL dak sendakba onüktem lemsatep

Dimapur, January 14 (TYO): January 14, 2020 nü Nagaland & Meghalaya Governor RN Ravi-i Minister, Road & Surface Transport Minister Nitin Gadkari den ajurutep.
Iba mapang Governor Ravi-i Union Minister Gadkari den Nagaland nung National Highways and Infrastructure Development Corporation (NHIDCL) projects indang tebilemtsütem lemsatep.
Nagaland nung NHIDCL kübok mapa balala inyakba ketdangsüa reprangtsü atema Kohima nung NHIDCL indang Regional Office ka lapokba atema Ravi-i pelaba metetdaktsü.
Iba ya Governor Ravi-i mepishiba ama inyakba mapa ka lir. Taoba mapang Guwahati nung North East indang Regional office ajanga dang ketdangsüa repranga liasü.
Senden nungsa Ravi-i Dimapur-Kohima 4-lane highway nung Slope Protection dak sendakba tebilemtsü lemsatep.
Highway nung Slope Protection shitak maliba ajanga anentsüh alutsü akok aser iba ajanga traffic nung timtem ajuruba den külemi lenmang raksatsü akok, ta Governor-i ashi.
Iba onük atema Minister Gadkari-i NHIDCL dang iba highway nung Slope Protection maparen shitak inyaktsü atema tetuyuba agütsü.
Governor RN Ravi-i Nagaland nung air, surface aser digital connectivity tajungba kümdaktsünür, ta PRO to Governor-i sangdong ka nung ashi.

Governor-i Sükrünye salem osang abener
Dimapur, January 14 (TYO): Governor RN Ravi-i Nagaland nung alirtem aser talisa Chakhesang nunger den Sükrünye benjung salem osang metetdaktsüogo.
Chakhesang nunger atema Sükrünye ya kanga dang tongtipang benjung ka lir aser iba benjung amongdang Tsüngremi nenok azükarudakjangma, ta RN Ravi-i ashi.
Naga nunger sobaliba takar aser inyakyim ya wazüka ayutsüla aser alima ainba den külemi jangyu medema anidaktsüla, ta paisa ashi.
Iba benjung amongba ajanga telongjem adokdaktsütsü aser Nagaland tasen ka yangerba nung shilem agitsü ayongzüker, ta paisa ashi.