Governori tatar senden ayongzüktsü mepishir

Kohima, July 13 (TYO): Yakanü July 11 nü Nagaland angh-i Chief minister dang pa den tatartem teimbaka dena ali asü mali züngdangtsü asoshi rongdak tatar senden ka July 15 tashi nungbo jazükang ta metetdaktsü saka Cabinet-i memulunger ta metetdaktsüba sülen, ano tanü Brehostibar nüa paisa chief minister dang July 15 tashi nungbosa pai pa den tatartem teimbaka lir ta tatar senden nung sayutettsüla ta mepishia metetdaktsüogo.
Tanü pai chief minister dangi züluba shidi nung, chief minister-i tatar senden jazüktsü nüngdak madoker ta ashiba kuli jagi mabensar, kechiyong pai pa den tatar teimba lir ta meshitetter ta angh-i metetdaktsü.
Tang yimten nung mepetmesü aliba ya NPF kija tebilemtsü masü saka tatar senden nung tatartem teimbaka pa den lir mali ta asüba ken o lir, anungji ibajibo tatar senden nung bendangtsüla ta angh-isa metetdaktsü.
By election alitsüba yabo constituency ka nung dang, anungji iba jagibo Council of minister-i tatar senden mayongzüktettsü ta tebilema mebilemtsüla ta angh-isa metetdaktsü.