Governor’s Awards agütsüogo

Dimapur, Aami (June) 8 (TYO): Aami (June) 8, 2018 nü Raj Bhavan, Kohima nung HSLC & HSSLC Examinations 2018 nungi takok tajung angurtem nem tetushi agütsüba sentong ayonga agi.
Tanü Toppers aser MILs & Skill Education Subjects nung Subject Toppers nem Governor’s Awards, Dr. Neilhouzhü Kire Angami Award aser Rank Holders nem sempet balala agütsü.
Sentong nung NBSE Chairman, Asano Sekhose-i tesentepertem pela agizükdang, “2004 küm taoba Governor, Shyamal Dutta-i HSLC & HSSLC Examinations nung toppers aser rank holders den sensaksemba mapang alitsü tenzüka yutsü. Iba sentong yagi kaketshirtem kanga ajungmeso aser 2010 küm taoba Governor-i Endowment Fund atema sen 13,00,000 agüja Governor’s Award agütsütsü mapa tenzüka yutsü” ta metetdaktsü.
Governor, P.B. Acharya-i May 26, 2017 nü MILs aser Skill Education Subjects nung subject toppers nem sempet agütsütsü osang metetdaktsü aser Awards tenzükba den sen 7,00,000 Endowment Fund agütsü. Takok angur shia nem sen 2000 aser sen 100 alang sempet agütsür, ta laisa ashi.
Taküm Dr. Neilhouzhü Kire Angami Award agütsür aser iba ya Dr. Neilhouzhü Kire Angami-i 1918 küm matriculation tatidang nung takok anguba sülen küm 100 ajungba nüngtem nung khen atema agütsür. Iba asoshi sen 1,00,000 senpet agütsür, ta Asano Sekhose-isa metetdaktsü.
Sentong nung DPS R.K. Puram, Delhi nungi class 11 kaketshir Bharat Goyal-i Career in Information Technology for Digital India indang onük tatsüka jembi.
Governor PB Acharya-i kaketshirtem, tsüraburtem aser tesayurtem nem tenüngsang agütsü.
NBSE-i mapang shitak nung results metetdaktsüba atema paisa tenüngsang agütsü aser Board Examinations nung takok angurtem teimba akümba atema pelaba shisem.
Linük kübok tangalen ama masü saka Nagaland nung takok angurtem rongnung tetsürtemi jenjang tajungba anguba atema Acharya-isa pelaba metetdaktsü.
Tangalenbo education tsütsü tetsürtem bendanga amshir saka Nagaland nungbo tanur ajak kasa ta züngshir, ta paisa ashi.
Naga nunger mezüng matriculate asür Dr. Neilhouzhu Kire tenüng nung 2018 HSLC topper nem sen lakh 1 senpet agütsüba atema paisa pelaba metetdaktsü.
Sentong nung Retd. DGP Nagaland, K Kire aser School Education & SCERT Principal Secretary, Menukhol John natia o tatsütsü jembi aser Pranab Vidyapith Higher School, Dimapur o Mezhur Higher Secondary School, Kohima kaketshirtemi ken aten.