Govinda-i pa sapur ka dang tatok meshi

New Delhi, February 9 (Agencies) : Küm ishika tejaklen Bollywood actor Govinda-i pa sapur ka dak maoktsüba atema sen lakh 5 temenok agütsütsü.
Hopta ana tsüngda Govinda-i iba nisung den ajuruteptsü aser tatok meshitsü atema Supreme Court-isa tetuyuba agütsü aser ibaji mulunga agizüka Govinda-i tatok meshiogo ta osang ajangasa metetdaktsü.
2008 küm Filmistan Studio nung ‘Money Hai Toh Honey Hai’ film yangluba mapang Govinda-i Santosh Rai ta ser nisung ka dak maoktsü. Santosh-i temelaba kecha magii dang sets telungi ait aser pai extra girls (tsüngsangertem) dak tim mesüi kongshiba aser timtemdangtsüba atema pai maoktsü ta Govinda-i ashi.
2009 küm Santosh-i Bombay High Court nung Govinda anema ken o ka benok saka 2013 küm Bombay High Court-i iba ken o ji magizük.
Ken o agütsüba nung ozüng anema inyakba indang kecha shia mali aser ano ken o ji tatalokba sülen küm ka lir ang agütsü. Anungji iba ya actor anema mapa inyaktsü atema benokba lir, ta Bombay High Court-i oshidang agüja ken o magizük.
Ajisüaka, 2015 küm Santosh-i iba kasa ken o ya Supreme Court nung benoka liasü.