Govt-i tashi manger !

Nagaland nung state government-iang railway mapa renloka aotsüba nung meyariteper ta Railway Ministry nungi arurtemi Dimapur nung Bodbar nü osangbenertem den jembidang ashibaji taoksatsüka, taaktsüka aser tejashitsüka lir. Yashi iba yimobilem nung züluba amato, state government-iang nübortem dang terenlok mapa takok ngua inyaka aotsü asoshi government den teka amteper inyaka aotsü ajungshiba mapang ka, state government-iang terenlok mapa meinyaktettsüsa inyaker ta center sorkar nungi arurtemi aija metetdaktsüba jagi state government mulungjang aser jakla angur. Yimsüsür aser tulurtemi külen nübortem dang ochishia alitsü lokti senden ajak nung ajungshir saka parnokiang ochimashi mapa tuluba inyaker, külen kaketshir aser lanurtem dang nendaka aser meranga inyaktsü ajungshir saka tajungshirtem jagiang mapa meinyaki nübortem meyong rongsen ajak chimar. Aji oda, külen yimsüsür aser ketdangsertemi nübortem dang government meyong rongsen apayua amshitsü ajungshir saka parnokiang government li ajak yokmar. Ibayongji, Nagaland state akümdang government li asütsü mekazüka ayuba ajak tanübo private meyong kümogo. Aji oda, temulung ashitsü kaji government nung ketdangsertemi tarutsü lanurtem indang mebilemdangi government li lazüka private nem agütsübajibo yutsür kaketreju lapoka alidak dena school ki jara tonga oagi private-i agiadoker. Ibaji private purtem jagi tashiyim agi agir masü saka government nung tulurtemi ali patta agütsüba ajanga agiadoker. Ali agirtem jagia kanga mebilemdangi agir, saka government li reprangtsü ayur tulurtemi patta agütsüba mapajisa tamajungba. Iba ama government li private nem lazüka agütsüba nungi tulurtem sen kwika anguar ashitsü makok saka sen kwisüdir süang iba ama senjibo pei lima aser pei nübortem mapayui ayokba sen lir. Item sen agiba jagibo kibong azükaru masütsü. Item sen jagibo temoatsü masü saka timtemang ajangzüktsü. Ashi, government li reprangtsü district shia nung DC office nung inyaker ketdangsertemi pei lima meima government liji private nem magütsüi, government meyong kiojensa meyangluaka, tesem tesem nung asayadak ground aser kazüdak park topur junga yanglutsü tenzük asübo asen lima nung yimtitem ya topur tajung  temenungratsü tesem ka kümdaktsütetla. Ochimashi mapa inyakba yagi alima majunger aser peii dena lendong ajurutsüsa ataloker. Tatishitsü agi, gate nung police-temi bomb mesüra ozüngi memelaba mechimeyongtsü abenba gari ka sen meshir yokba agi alima nung lendong ataloker. Gate nung sübokrem sen agiba ajanga police ka ana takar akümtsüa akok saka pei limabo sen agia malizüktettsüsa alima tsüngdang tetsübutsü lima ka kümadoker aser nisung taküm aika samatsüsa lendong ataloker. Ibayongji, pei lima meimba nisungi kodanga iba ama ochimashi mapaji meinyaker. Kasaji government li anükertemi railway pur train lenmang yangluba mesüra kiojen yanglutsü alia ayuba li dena private nem patta agütsü tenzükra, asen lima tilaka yabo government li anüker tulurtem nem yutsür tangaleni belena ao tajungba asütsü. Pei lima renloktsü aser ajungtsü mebilem pei agitsü kija bilemba yimsüsür aser tulurji pei lima ashioktsür tulutiba lir. Parnokji nübortem tenzüka anepalutsü asoshi government mapai ai masü saka aritepa takar akümtsü asoshi aiba lir. Item jagi office nung aliba oset dena ayoktsü aser sen bendentsü mechi government li ajak yokadoktsü,. Itemji DC aküm nungbo, Chief Secretary aküm nungbo mesüra minister aküm nungbo pei amenba office li dang masü saka Nagaland ajunga yokadoktsü. Iba jagi ayoker südi aser iba jagi railway mapa merenloktetter, bus senzüba lenmang meyanglutetter aser sen dang ngura ojanga ta ser school aser mozü ki li dena mapayui private nem patta agütsür. Tanü amai yimsüsür aser tulurtemi pei kisüng agitsü rongsen yamaisa bushi nungbo, tilartembo küm ishika tsüngda chiyongtsüa mangu kongrasüker sümadoktsü südi ta shisabolua bilemer !