Govt. mapa nung shimbayim

Karibo government mapa ya meinyakner, kechiyong government temzüng ozüng kübok kilir ama, taküm nung tashi itta ali piyong melinür. Aji oda, government mapa nung inyakertem rongnung teimbaka pei dak aketba sempet, tashi aser temetetba noklang shilem nung tesadanga mamshiteti arishi atemer. Ajisüaka, government mapa inyakba nung shisaboluka mali, kechiyong shiranga mapai maoyonga ita senbo angutsü aser ita sen chia inyaker külenang ano mapa nungi anenba mapanga pension sen aika angutsü. Ibaji tenükshitsüka, ibayongji tebilemtsü kangabo melii ita sen chia alitsü atema nisung teimbakati government mapa bushir. Ano, talisa asen lima ama nung, tang tashi asenoki asenoksasa mapa bushia metenzüktetter, kechiyong asenok dak iba ama shisatsü aser temetetbaji peria mali, anungji lenmangbo aika lir ser nung mangur. Iba ama putu tensa ka nung asen lima nung zünger mapa manguba indang kanga tebilemtsü tulusa jembir. Atangji, zünger mapa manguba tebilemtsüji tulu, kechiyong zünger külena mapa mengura mazüng nungbo koma asütsü ? Ajisüaka, kodang asenoki zünger mapa manguba timtem indang ya jungjunga bilemdangdir, zünger peisasa mapa tasen apiteta inyaktsüsa mesayu aser mazüng saka tazünger ajakji government mapa nung ita sen tilaka asüyonga shisamebului agia tebok mesüa alitsü asoshi sayu aser azüngba ajanga adoker ta angatettsü. Tetezü zünger mapa adokdaktsütsü aser mapa agütsütsü nükjidong yur azüng masü saka government mapa inyaktsü asoshi kisüng bilema azüng, iba jagi tazünger aser mazünger ajak government mapa bushir. Aji oda, onsara rakteper asünungji, governnment mapa ya angati anguba oset masü saka bazaar nung ayokba oset amai ka dang kümogo. Joko, Naga nungerbo Naga nunger saka sübokrem mamshira mesüra election nung yariba candidate adoka government nung melira Naga nunger lanurtem asoshi government mapa angu kanga tasak kümogo. Iba ama tensa mapang ka nung government mapa nung shimba yimya ya tang amaisa ora, government ya nübortem tenzükba government masü saka mapa mashi aser memetet ser ita sen chia aliba telongjem telokang ka mesüka akümtsü. Aji oda, government mapa ya kodang lanurtem rongnung temsüa alirtembo mangur saka metemsü süaka mapa bushi ashiba agi angu ta südir, tenmsüa alir lanurtem jashitsü aser alima mesüngjemteti akümtsü. Tanü Nagaland nung kaketshirtemi ola adokba ya angadangra, government mapa nung inyaktsü asoshi Naga nunger lanurtem ajak nem kasasa maongka agüja tendanger shimer masü saka kodang komaser shimar memeteti government nung tashi alirtemi pei akok aser pei ajung asaa shimer alir. Item rongnungji tang Nagaland police nung nisung 994 tashi kecha metendangi Naga lima mittsü asoshi sepai shimba otsü ya asütsü. Sepai nung shimdangbo tar, teku aser temepu ajak asadanga reprangdanger külenang, ano asemdaktsür aser temang nung tashidak ali mali repranger. Atangji, akhidang nungi Nagaland police shimba yimyaji yamajisa arua alitsüa akok, saka iba ama tim masüba yimyajibo anentsüla aser tang nungi danga tetemsü asangur aser aiürtem jungjunga tendanger, Nagaland mera akettsüsa, Nagaland anüktsü aser mittsü pur mitkartembo shimtsüla. Ibaji dang masü saka tang kaketshirtemi Nagaland state government dang akangba ama, tang nungibo government mapa bushirtem ajak nem kasasa maongka agüja tendanger shimtsü asoshi Nagaland Staff Selection Board ka yaktasa tentettsüla. Idangjibo, government mapa bushidang party otsüa aser candidate otsüa mejembitsü aser süngojemtsüa mamshitsü. Iba ama inyakyim melenshiba ajanga dang memeteti Nagaland nung election-a junga agitettsü. Asen lima tang aser tarutsü nung ajungtsü majungtsübaji, talisa, government mapa nung inyakertem shimba yimya nungi tenzüktsü. Government mapa nung inyakertem shimba mapa yan indangindanga inyakra, iba jagi asen kin ajungkettsü.