Govt mapa raktepba putu

Tawa Bangladesh nung government mapa adok shia, akhi ama,  nisung kar asoshi shilem balaka shiteta yutsütsü asoshi obendangdak nungi obendang agütsüba anema lanurtemi longkak aitba mapang nisung 163 tashi taküm aotsüsa atalokbaji kanga tesasatsüka lir aser iba jagi tanü putu nung kaketshir aser lanurtem rongnung government mapa raktepba tensa tia indang sayur. Atangji, lanurtem rongnung government mapa raktepba ya bangladesh nung dang masü saka asen lima nunga kasa tebilemtsü agi lanurtem taküm aika timtem takoksa ajurudagi. Atangji, Bangladesh nungbo alima kin tapu balala nungi takartemi industry tapu balala amenoka lir, anungji item industry-tem nungji Bangladesh nunger aika mapa ngua inyaker. Ashiko, asenoki sema aliba tula süoshi-jia teimbaka bangladesh nung yangluba asütsüa akok aser yamaji asenoki achiba chiyongtsütema bangladesh nung yanglua seper yokba chiyongtsütem asütsüa akok. Ano, parnokbo tzüim tzüküm nung alir asünungji rong yangludaka lir aser anogo shia rong aruli oli ta senzüba mapatem kisüng nunga  nisung aika  mapa ngua inyaker. Iba mapatem jagi mataba nisungtem asen lima tashi aruagi asenok den külemi lia ayanger nisungtema lakh junga lir. Iba ama lima ka nung government mapa adok shia noklang nung shilem 56 ( 56%) telok balala nem shiteta yutsür tanüngba bangladesh nunger lanurtem asoshibo government mapa adokba nungi noklang nung shilem 44 dang yutsübaji, atangji,  Govt. mapa bushir lanurtem asoshi tezüdangtsüka aser tejashitsüka lir. Bangladesh ya East Pakistan ta ser tang aliba pakistan den yimten külem ser liasüba, india teyari ajanga 1971 küm yimten nüchiso angu aser East Pakistan agi Bangladesh ta melener alima nung parnoka nüchiso akaba kin tasen ka ser temzüng ozüng aser inyakyim tenzüka aodang, 1972 küm Bangladesh government kübok kechi mapasa adokdir, item mapatem nungi noklang shilem 30 (30%) Bangladesh yimten nüchiso asoshi rarartem nungi jakzükba semchirsemnurtem asoshi shiteta yutsü aser tanüngba 26% ji kin tila purtem aser matamabensartem ama telok nem shiteta yutsürbo bangladesh nunger tanüngba nütsüng teimbaka asoshibo 44% dang anüngzüka toktsüba ajanga bangladesh nunger kaketshirtemi tamalena iba telemtetbaji agientsü atema takangba agüja longkak aita aiben timtem agiogo. iba jagi bangladesh government-i tang aliba sheikh hasina, lasa  ato kilonser aliba mapang 2018 küm bangladesh nung government mapa telok balala asoshi shiteta yutsüba telemtetba aser sentongji kenyongi agienadok. Iba jagi küm pungo trok ka bangladesh lima tesünep nung lia aruogo. Ajisüaka, taoba ita nung bangladesh high court nung obendangertemi bangladesh nung government mapa bushirtem asoshi “reservation quota” ji akhi ama 56 % toktsütsü ta obendang agütsüba ajanga bangladesh lima mapa aisü nung kanga akoksaogo. joko, tangbo lanurtemi longkak aita akang marem bangladesh government-i government mapa 56%  balaka shiteta yuja aruba nungi 7% dang shiteta yutsütsü telemtetba agiogo. tang telemtetba tasenbaji ajanga bangladesh nüchiso atema rarar semchirsemnurtem asoshi govt mapa 5% shiteta yutsütsü aser tanga telok atemaji 2% yutsütsü aser tangbo bangladesh nunger tanüngba government mapa bushirtem asoshi mapa adok shia 93% ji parnok meyong asütsü. atangji, tapayutsü senti taküm  163 bo samaogo saka parnok taküm tenla ajanga bangladesh nunger lanurtem aika tang aser teti tajangzük angutsü. Peisasa mapa apiteta inyaktettertem atemabo government mapai aibajiang takoksa asütsüa akok saka nisung aikati government mapang-ang tayongba aser tajungba amai bilemer, kechiyong government mapa nungbo ita sen dang masü teyari aika keta lir  aser shirangyonga ita senbo angutsü aser mapa nungi anenaka pension angutsü aser pension meliaka mapa nungi anendang sen aika agizüker. iba jagi alima ajunga nung government mapa rakteper. anungji, asen lima nunga government mapa ya kin apia masü saka sensaker aser tilar kibong asoshi shilem tilaka shiteta yutsürbo tanüngba mapa atemaji ajak nem kasasa maongka agüja toktepdaktsür tajngtibatem shimra, mapa bushirtem rongnunga temsüa alirtem angutsü aser government mapa nunga takok ngua inyaktsü.