Govt. Middle School, Artang building tasen semzükogo

April, 28, 2016 nü GMS Artang building tasenba semzükba sentong nung tongti tesemdanger, R Imsusenla, SDEO Mokokchung den GMS Artang staff aser tangartem tangokba noksa nung angur. 

Mokokchung, April 28 (TYO): Brihostibarnü Mokokchung SDEO, R Imsusenla-i, tan puto nung tesayurtem khuretji kanga tulu ta shia tesayurtem dang tayongzükba ajak koktettsüsa kaketshirtem tajemdakdak akhanga yanglutsütsüla, ta metetdaktsü.
GMS Artang Building tasenba lapokba sentong nung tongti tesemdangeri o jembidang Mokokchung SDEO-i iba o ya jembia liasü.
SDEO Imsusenla-isa, tesayurtem school-i moi itasen dang agizükba mesüra pei teinyaktsü mapa meinyaki tesayur temelen yokba ajanga shisaliok inyakyim nung tetsükdaktsü bener arutsü, ta metetdaktsü.
Lai ashiba agi, tesayur mapa ya pei taküm alitsü atema dang masü sak akhümket mapa ka lir, anungji kanga süoki ia aser nendaka inyaktsüla.
Tan shisaliok tsütsü tsüraburtem aser nüburtem dendaktsütsüji nüngdak aser tanurtem nem shisaliok tajung agütsütsü atema lokti teinyaktsü lir, ta lai ashi.
Iba dak sentakba nung lai Ward Education Committee dang school junga aotsü aser tanurtem nem shisaliok tajung agütsütsü atema inyaktsü ayongzük.
Laisa tesayurtem aser staff tem dang, kaketshir tajung adokba dang masü saka senso tajung kaka akumtsü atema maneni anibelem arema inyaktsüla, ta ayongzük.
Shisaliok dak sentakba nung lai, arishi küm 6 nungi 14 tanur ajak nem shisaliok tajung agütsütsü atema Centre sorkari benokba SSA (Sarva Shiksha Abhiyan) densema state-i mera balala agia inyakdar, ta metetdaktsü.
Tanü iba sentong nung GMS Artang Head Teacher aser Artang Ward Chairman natia o jembia liasü aser Artang Baptist Arogo Sannüker, Bendang-i temaotsü meshia sarasadem.
Artang WEC Chairman-i Building yangluba osang metetdaktsüdang, iba school ya 1968 küm GPS ama tenzük aser 2012 küm GMS akum. Iba Building yangluba atema Estimated amount ji sen 15, 94,977 (SSA kübok) lir, ajisüaka tang tashi department-i fund shilem tenetbuba, sen 15,4895 magütsüi lir, ta ashi.
Kasa report nung, tang yangluba building tasen renemtsü atema WEC-i loan agi, ta shia lir.