Govt. Primary School Imrongtema Mongsenyimti küm 75 jubilee mungogo

Mokokchung, November 27 (TYO) : Mongsenyimti yimtak school tejentiba ‘Government Primary School Imrongtema Mongsenyimti’ mesemteter küm 75 abensaba jubileemung Mongolbarnü school premises nung kanga takok ngua mungogo.
Sentong nung tongti O jembir, Sentilong Ozükum, EAC Medziphema-i “Sparkling the Future” onük nung ajemdaker jubileemungertem ayongzüka jembidang, ‘shisaliok nükmen’ amenshitsü nüngdaka aliba lemsatep. Educational ranking kübok reprangdangra India-bo jenjang 92-buba nungdang aliba benoka paisa, ‘azüngba, züluba aser ongku inyakyim ya kanga tejen kümadokogo anungji iba inyakyim ya külemi teka amteper inyakba (Collaboration), ratetralem shisatsü (Creativity), Aroka shisadangba (Critical thinking) aser osangtsüsang tongtepratepba (Communication) koba dang 4C system ta ajar iba inyakyim dangi melenshia aotsüla, aji asünungdang alima den asenoki jangyu medema otettsü ta ashi.
Azüngba yari asenia alima asoshi kechi inyaktsüteter ta asüba tangatetba yur züngra sorkar mapa kija nung metaloka meli-i pei dak aketba sempet amshia poksünga alitsü tangatetba dangi arutsü teimla paisa lemsatep.
Jubilee-mung sentong nung I. Temsumangyang, Teacher in Charge GPS Imrongtema-ia tepela O tatsüka jembiba den Imtimempang, pastor Mongsenyimti Compound Baptist Arogo-i ketdangsüa asür nem akhüm agütsüba temaitsü minute ka mokremer sarasademja liasü. Jubilee nüngu kaket L. Alemtemsü Ao, Area Education Officer (AEO) Mokokchung-i sayatsü aser M. Lima Ozükum, Chairman Village Council, Mongsenyimti; T. Yanger Ozükum, Chairman village Education Committee; S.O Meren Pongen, Alumni; C. Lima Ozükum, President Mongsenyimti Senso Mungdang aser R. Bendangyapang Ao, Asst. Head Master Govt. High School Mongsenyimti nungeria O tatsütsü jembia liasü. Iba den Mongsenyimti Student’s Union ajanga talila ken ka tena jubileemungertem ayongzük aser Omenjungla aser Temsumenla nati ‘Kü school’ sangro ka zünga liasü. Purtongzuk Longkumer-i ketdangsüa aniba sentong nungsa Imli, Pastor Mongsenyimti Baptist Arogo ajanga temoatsü jazüka sarasademtsüba sülen J. Marngangshi Jamir, Barrick-ia school tenzükba aruba otsü tatsüka ashi aser O. Nungshi Lemtur, Convenor Planning Committee ajanga melepzünga tembang.