Govt telemtetba junger !

Nagaland nung teinyakdak medical doctor-temi parnokbo mapa nungi anentsüba küm, tangar department nung inyakertem den kasasa mesüi tasoba küm 60 aliba nungi küm ana temlokjang ta akangba aser Eastern Naga Students’ Federation (ENSF) teloki Nagaland Service Selection Board (NSSB) ajanga tendanger külen state government mapa nung shimtsüba inyakyim kübok, department ajak aitdaktsütsüla ta akangba onüktem ajak kenüyongi ataloktsütsüsa state government-i telemtetba agibaji kanga junga agiogo. Medical doctor-temi akangba onük nung balaka, Naga Students’ Federation aser Eastern Naga Students’ Federation teloktemi kanga memelungi liasü, ajisüaka doctor-tem aser kaketshirtem na prongla temulung achitsüsa, tang state government mapa nung inyakertem mapa nungi anentsü atema tasoba küm 60 nung lateta aliba ya, balaka, doctortem asoshi matsülanger, saka mapa nungi anener külena ano taküm tajung anema lia, nübortem temang anepaluba nung inyaktsü mulungra, küm ana asoshi shimshitsü akok aser ano medical college nung sayutsü purtem asoshibo arishi küm 65 tema-a intaktettsüsa tiyongtsü ka nung telemtetba agiba jagi ajak atema tebilemtsü tuluka kokogo. Atangji, medical doctor-temi akangba amaji temang dang junga lira, tanü asüng tasoba küm 62 ji tashi itdang, anungji ano nübortem junga yaritettsü. Ajisüaka, tang mapa nungi anentsü purtem sülen tanupur aser tanutsür doctor-tem aika parnok anener külen parnok melena jenjang temabai atutsü yongyaseta lir aser kar mapa nungi anen nung dang tasen purtem asoshia mapa adoktsü, anungji mapa inyaktsü küm ana süklokba jagi tambu tantsütembo ajangzüktsü saka parnok sülen aturtem akoksatsü, kechiyong Nagaland nung government mapa nung inyakertem mapa nungi anentsüba ya tasoba küm dang masü saka mapa nung inyakba küm, service length, dena agir, anungji tasoba küm agi mabensayonga mapa nung inyakba küm agi abensar. Ano, tebilemtsü kaji kasa government kübok inyaker ser nung mapa nungi anentsüba küm balala latettsüba jagi tebilemtsü aika adoktsü. Item ajakji rajema state government-i telemtetba tajung agiogo ta angatetter. Ano, government mapai NSSB ajanga aitsüba inyakyim nunga department karbo parnok shim shimtsü saka tangarbo NSSB ajanga dang shimtsü ta mesüi ENSF purtemi akangba ama, department ajak NSSB küboki aitdaktsüba jagi government mapa bushirtem rongnung temsüa alir lanurtem aika maongka angutsü. Tanübo Nagaland nung tesayurtem nungi shir mitkartem tashi government nung tashi alirtem den kinunger adianu aser tesendaktep tajung alirtem dang shimer. Aji oda, election mapang nunga vote melena kari sen meshir aser kari government mapa meshir, iba jagi Nagaland jungnüseta majunger. Iba tebilemtsüji, tang NSSB ajanga government kübok aliba department ajak nung inyaktsü purtem tendanger shimtsü ta government-i telemtetba agiba jagi akoktsü ta bilemer. Atangji, aiben government nung alirtemi parnok mulungba nung masü saka lokti tentettemi anung marem parnoki akangba onüktem nung dang telemtetba agiba angur. Ibayongji, karibo lokti tentettemi yimsü asür asü, government nung alir yimsüsürtemi yimsü asür ta aitsüba angashir. Ajia tim. Ajisüaka, government-ji yimsüsürtem atema masü saka nübortem asoshi, anungji nübortem ajangzüktsü atema nübortemi tentetba lokti telongjemtemi ashiba angabaji nübortemi ashiba angar asütsü. Aji oda, nübortemi ayimtenba mangashi aser lokti tentettemi akangbajia manga ta ser, government nung alirtemi bilemba nung dang ora, alima nung tesünep malitsü. Iba jagi rongrong aser petsaperongang tali-tali adoktsü, anungji ken belemtsü agi anaben belemtsü. Iba tangatetba nung koba government südir süang nübortem asoshi inyaktsü tentetba lokti tentettem den angatettepa aotsüla. Iba jagi mapang, rongsen aser nisung taküma kümzüktsü aser alima melamelaa tejakleni renloka otettsü.