Gowda-i 2016 Rio Olympics nung shilem agitsü jenjang angur

New Delhi, December 12 (Agencies): India nunger discus toktepa aoner, Vikas Gowda-i 2016 Rio Olympics asayamong nung shilem agitsü jenjang tanü Honibar nü ajangzükogo.
Alima ajunga nung athletics asayabaren ketdang asür, IAAF-i Olympics nung shilem agitsü jenjang ajemtsüba sülen Gowda-i tan Olympics nung shilem agitsü jenjang ya angu.
IAAF-i Rio Olympics nung shilem agitsü asoshi tebur discus aonertemi tajemba agi discus meter 66.00 tonga aontsü taküm April ita latettsü saka ibaji melenshija discus tajemba agi meter 65 aontsü latetshitsüba ajanga Gowda-i iba jenjang tajung ya nguogo.
Asian championships nung defending champion aser 2014 Commonwealth Games gold medallist, arishi küm 32 tain Gowda-i taküm May ita agiba Jamaican Invitional Athletics Meet nung discus meter 65.14 tonga aon aser iba yongji pai Rio Olympics nung shilem agitsü jenjang angu.
“Jamaica nung asayaba asayamongji IAAF-i agizükba asayamong ka lir aser iba yongji, Gowda-i Rio Olympics nung shilem agitsü jenjang angu,” ta Athletics Federation of India (AFI) nung secretary, CK Valson-ia osang jangjashitsü.