GPRN-i Ao Senden lennirtem den senden amen

October 23, 2018 nü Dimapur nung Government of the People’s Republic of Nagalim aser Ao Senden lennirtem külemi agiba noksa ka angur.

Dimapur, Mongputeni (October) 23 (TYO): October 23, 2018 nü Government of the People’s Republic of Nagalim-i Dimapur nung Ao Senden lennirtem den senden ka amen.
Senden nung GPRN tenüng nung Hukavi Yepthomi, Kilo Kilonser aser Lieut. Gen. Anthony Shimray, Military Cross, Longvibu, Naga Army nati anir tangartem aden, ta MIP sangdong ka nung metetdaktsü.
Senden nung Ao Senden lennirtem aser GPRN lennirtem tsüngda tang tagidak Indo- Naga yimjung olemtep indang onük lemsatep aser iba mapang tebilemba aika benok.
Ao Senden lennirtemi parnok GPRN den dena lir aser tekaratiba nung Indo-Naga yimten ken o angatetteptsü imlar ta ashi, ta MIP sangdong nungsa metetdaktsü.
India sorkari Naga putiotsü agizükba aser August 3, 2015 nü Framework Agreement agiba osang Kilo Kilonser-i metetdaktsü.
Longvibu-ia Ao Senden lennirtemi Naga linük tashitaitba küma yangertsü atema shisatsü agüja yaritepba atema pelaba metetdaktsü.
Iba ama tesentaktep tajung ayuba ajanga Naga nungertem tsüngda temeimtep aser tangatettep adoktsü ta GPRN-i imlar. Asen Naga civil teloktemi tatembang telemtetba ka magi tashi iba kasa tangatetba nung noktaktsü imla atar, ta MIP-isa metetdaktsü.