GPRN-i asür Isak Chishi nem akhüm agütsü

Kohima, Aami/June 28 (TYO): GPRN Tir, (asür) Ino Isak Chishi Swu-i Naga nunger temeden atema küm 58 tashi rara-a aruba sülen mapang talangka shiranger 2016 küm tanü anogo, Aami/June 28 nü New Delhi nung asü, ta tanü GPRN Ministry of Information & Publicity sangdong ka ajanga metetdaktsü.
“Pa ya Tsüngrem tsübuba nisung ka liasü aser tatem tashi tangatetba nung ajangajanga nokdaker ka liasü. Atangji pa ya yimjung atema inyaker ka liasü, aser asen kibur Yisu Khrista temeim ajanga longjemtsü atema pai asenok dang sayu. Pa akumli piyong pai Naga nunger nükjidong yur longjemtsü atema jembia aruogo. Naga nunger külem teimla aser Naga nunger nüchiso atema chichiba tesendaktep asoshi pai tongti shilem agia aruogo,” ta sangdong nung shia lir.
“Pa lenisüba kübok NSCN nungi teshimtet teloki US, Europe aser Asia nung linük aika semdanga pai anibelem jenti arema inyakba ajanga alimai Naga nunger onük meteta akum. Iba mapang nungji pai 1993 aser 1994 küm Geneva nung United Nations Working Group on Rights of Indigenous Peoples sendentem nung onük jembia liasü,” ta MIP sangdong ajanga metetdaktsü.
“Pa asoba sülen küm 46 lir kanga nüngtugu document, Shillong Accord, koba ajanga India temzüng agizüker, ibaji 1975 küm külen ‘Naga underground organizations’ nungi züngsemtemi, aser külen iba mapang nungji Assam Angh, LP Singh-i India representative ama sign asü. 1975 küm sign asüba anogo- Yimpoksüi/November 11 anogoji pa asoba anogo liasü. Pa 1929 küm aso, iba küm nungji taoba Naga Club (NC)-i British nunger Instrument of Succession tongti, Simon Reform Commission nem monumental representation ka agutsü. Linük tenzüktsü atema 1958 küm Luchii/December 5 nü pa züngsem akum,” ta sangdong nung shia lir.
“Item tatalokba ajungaji ajanga Naga linük nokinketer den sendakteper, shiba küm ana tejaklen 2016 küm tanü, Aami/June 28 nü akumli tembanga liasü,” ta kasa sangdong nungsa shia lir.
“Nagalim madak India tashi aliba anema nüburtem nem nüchiso/temeden agutsütsü atema pai küm 58 tashi rara-a aruogo. Item küm 58 nung linük nokinketer kati inyaktetbatem lir aser pai par nüburtem nem nüchiso agutsütsü atema melungsoa khuret abenba otsü lir. Tarutsü lanu putu nunga tenla agutsüba tatishitsü tajung nung pa teti tetshitsü aser pa dang nungi tatishitsü agia benshitsü,” ta MIP sangdong nung shia lir.
“Iba anogo, Aami/June 28, 2016 nü asen linük nokinketeri asenok toktsü, ajisüaka pa tanela asenok den tang tashi lir; aser asenoki pa bilemtetdang aser pa sür küm ana ajungba anogomong amongdang tenla agutsütsü atema asen tanela akasodaktsür. Naga nunger tematiba akhüm agutsüba temaitsü tanü Naga linük wako tom nung ayu aser sorkar office tem shibanga liasü,” ta kasa sangdong ajanga metetdaktsü.
“Naga linük nokinketer (asür) Ino Isak Chishi Swu tushiang! GPRN Tir tushiang!,” ta GPRN MIP sangdong ajanga metetdaktsü.