GPRN-i Rengma Naga Hills, Karbi Anglong lenirtem den senden amen

Dimapur, November 10 (TYO): November 10, 2017 nü CHQ Hebron nung Kilo Kilonser, GPRN, Hukavi Yepthomi aser Political Commissar, NSCN, Lieutenant General Ningkhan Shimray na leniba nung NSCN lenirtemi Rengma Naga Hills & Karbi Anglong, Assam nungi gaonburas aser Naga public lenirtem den consultative senden ka mena liasü, ta tanü NSCN/GPRN, MIP sangdong ka ajanga metetdaktsü.
Iba senden nung Steering Committee züngsemtem, Kilonser tem, Deputy Kilonser tem, Cabinet Secretary, Kilo Secretary aser GPRN Secretariats nungi staff tem densema GPRN lenirtem aika dena liasü.
Iba senden ya Kilo Secretary, M. Daniel Lotha leniba nung agi aser James Rengma (Pastor)-i sarasadema senden tenzüka liasü.
Kilo Kilonser aser Political Commissar-i iba senden nung adenertem dang tang yimtenren ken o tejembidak osang metetdaktsü. GPRN lenirtemi, public lenirtemia shilem tajung agia inyaktsüla, kechiyong tang ibaji nüngdaker ta lemsatep.
NSCN lenirtemisa, Naga nunger tabensa nüchiso angutsü atema Framework Agreement ya lenmang lir, yimtenren ken o latettsü atema iba nungji Naga nunger putiotsü khenyongi balaka aliba aser Naga nunger tim temetentem indang junga shia lir aser agizükteta lir, ta metetdaktsü.
Aji oda public lenirtemia 2015 küm August 3 nü India sorkar den Framework Agreement agitetba atema NSCN lenirtem dang pelaba lemsatep. Parnokisa, yimtenren ken o tatembang telemtetba ka dangi arutsü mapang ka nung tamalen ali rakzükertemi Assam nung Naga nunger li rakzüka alibaji Naga nunger kiburtem nem meyipa agütsütsü atema rongdak süa inyaktsü nüngdak, ta mepishia metetdaktsü.
Public lenirtemisa Framework Agreement aser NSCN/GPRN lenirtem nungittsü, ta metetdaktsü.
Tatar, Tennyson Rengma-i tepela anküp o jembi aser Western Rengma Baptist Association Tir, Kesenga Rengma-i sarasadema sentong kanga takok ngua tembangba liasü, ta sangdong nungsa shia lir.