GPRN-i RIIN ashishir

Dimapur, July 12 (TYO): Naga nunger ya pei litsü nung alir aser yamaji liyonga aotsü. Naga nunger yimten sabang ka kübok alitsü temeten lir aser iba telemtetba agiogo. Anungji, tawa state sorkari Register of Indigenous Inhabitants of Nagaland (RIIN) yanglutsü merangba ya Naga nunger temetentem den meputep lir, ta GPRN MIP-i metetdaktsü.
Iba ya ’16-Point Agreement’ posemba teloktemi aginüba ama inyakba mapa ka lir. ‘Nagaland state’ ya Naga nunger linük ajunga masü, ta MIP-i ashi.
Naga nungertem artificial state aser international arrtsütem ajanga lemsatsüba kodanga magizüktsü aser iba ya Naga nunger ajaki tongti süa bilemer. Anungji yimten tsütsü kechi mera agidir agiaka, iba telemtetba sülen anidaka agitsüla, ta MIP-isa ashi.
Naga nunger litsü ajak ka akümtsübaji India sorkari agizüker aser iba ya nisung kar dak alia Naga nunger ajak indang temeten lir. Naga nunger kongsa lidir liaka, pei litsü nung lisopurtem lir aser iba tangatetba nung onoki ammeta lir aser shingaia iba ya meraksatsüla, ta MIP-isa metetdaktsü.