GPRN-i Shiniho, Shaboh na atema mangyimer

Dimapur, March 13 (TYO): Zhekeshe village (Sumi Region) nungi Tatar status, Union Territory (UT), Shiniho Awomi anojungi March 8, 2019 nü asüba aser Nyanching village (Konyak Region) nungi General Head Quarters (GHQ), Naga Army nung Army No. AB-80637, Captain Shaboh Wenkingsu mapang talangka shiranga arur March 12 nü asüba osang angashia Government of the People’s Republic of Nagalim (GPRN)-i jashia mangyimer, ta tanü GPRN MIP sangdong ka ajanga metetdaktsü.
Captain Shaboh-i 1998 küm January 2 nü linük tenzükba nung aden. Longvibu aser Naga Army ajaki asür nem akhüm agutsür aser pai Naga linük junga tenzüka aruba atema office of the Longvibu, Naga Army-i asür nem Major rank agutsür, ta kasa sangdong nung shia lir.
“Tenati tasünü tashi temelung ajak agi linük nendaka tenzükogo. Parnok tenüngji Naga nunger putiotsü nung züngoktsü aser Naga linük atema parnoki tenlabaji teti bilemtettsü,” ta sangdong nung shia lir.
GPRN-i tasütait jabasotem nem akhüm agutsür aser mangyimer kibong züngsemtem den mangyim jashi lemsateper. Asürtem tanela tesünep nung anisüngzükdakjang ta sarasademtsür, ta parnokisa lemsatep.