GPRN MIP-i nüburtem dang sangdonger

Dimapur, Mongputeni/October 23 (TYO): Nagalim nung Arogo tentet aikati India-Naga yimtenren ken o tesünep nung tajungba agi latettsü atema sarasademba atema melung chia pelar, kechiyong ibaji tongtibang onük ana ajanga lir- wako aser temzüngji Tsüngremi agütsüba Naga linük atema lir; item ama anüngdaka aliba onüktem nungi Naga nunger shinga jenbua mali, kechiyong ibai asen maitsü aser akhüm lir, ta Bodhbarnü GPRN MIP sangdong ka nung metetdaktsü.
“Naga nungeri sarasadema Tsüngrem dang item onük abentsü dak alaka kechi ali! Iba ama kanga tongtibang mapang ka nung shisatsü, tangatetba aser lenibaji kanga tongtibang. Aseni temelungjang temerük agi dang sarasademra Pai asenok dang langzütsü,” ta kasa sangdong nung shia lir.
“Arogo tentettemi telongjem aser Naga yimten teloktem tsüngda tesendaktep tajung alitsü atema inyakba asoshi National Socialist Council of Nagalim-i kanga pelar,” ta sangdong nung shia lir.
“Iba ama putiotsü asütsüsa mapang ka nung iba ya atangji Naga nungeri melungba ta onoki bilemer. Tsüngremi melungba ama Naga nunger melungjang, talisa yimtenren teloktem melungjang nung jembitsü atema asenoki maneni sarasademdi. Tsüngremi agizüktettsüsa Nagalim for Christ nüburtemi ajemalutsüla. Asenoki yimtenren atema raraba kanga tongtibang mapang nung Naga nungeri lumia sarasadembaji amajok nung metembangtsüla. India-Naga yimten onük tesünep nung latetba ajanga Tsüngrem tenüng sentsüwangshidaktsütsü. Asenoki longjemer Naga nungeri ayimtenba ola angadi,” ta GPRN MIP sangdong ajangasa ayongzük.