GPRN/KTU-i Khailun Haokip asüba atema mangyimer

Dimapur, June 04 (TYO): Kuki Tribal Union nungi GPRN Steering Committee züngsem, asür Khailun Haokip June 1, 2017 nü tepsetba atema GPRN-i mangyimer; pa ya May 27, 2017 nü Manipur, Ukhrul district, Kajong Block kübok Natjang yim nungi puer ao, aser June 1, 2017 nü KNF (N) James teloki tepset, ta GPRN Steering Committee züngsem aser Kuki Tribal Union Tir, L H Paohao-i sangdong ka nung metetdaktsü.
“Asür Khailun Haokip ya mapang ka nungbo KNA (Kuki National Army) nung liasü. KTU den senden amendang, India-Naga yimtenren onük tashi aittsü atema parnoki NSCN/KTU den lokteptsü lemtet. Iba dak sendakba nung pai NSCN nung aden,” ta Paohao-isa ashi lir.
2015 küm August 3 nü tezüngzüktep agiba Framework Agreement pusema nungiter lenirtem rongnung pa dena liasü. Pa temang mejungaka, pai linük atema inyaka pa tajungtiba agütsüogo, ta paisa shisem.
“Tanü onok Kuki Tribal Union, aser Naga linük atema tashitait lenir ka makai kümogo, shibai Naga linük atema pa tajungtiba agi tenzüka aru. Tanü pa asenok den meliaka pai Kuki aser Naga linük atema inyakbaji teti bilemtettsü aser Naga Kuki-i tarutsü nung menungraa bilemtettsü,” ta sangdong nung shia lir.
Asür kinüngtsü Mrs. Nemneilhing Haokip aser lar kibong den mangyim lemsatepa, “Nü kinüngbu, tebu ka aser linük lenir ka asüba atema Kuki Tribal Union Tir aser NSCN nung ajaki tanü mangyimer kibong den külemi mangyimer. Tarutsü nung linüki nenok tepela aser tejashi mapang ajak nung nenok den alitsü ta onoki nangzüker,” ta sangdong nungsa shia lir.