GPRN/NSCN aser NNC/FGN-i Nagaland nung Naga nunger atema inyaktsü

Deobarnü designated camp, Khehoi nung 8 buba Naga Unification sentong nung (abelen nungi) Alezo Venuh, Puthai Lam, N Kitovi Zhimomi, Temjenyanger Aier, Z Royim Yimchunger aser Kiumukam Yimchunger nungertem külemi angur.

Dimapur, November 22 (TYO) : India aser NSCN-IM tsüngda August 3, 2015 nü framework agreement agiba raksatsütsü merangba olulutem nungi kümdangi liang ta NSCN(IM)-i Naga nunger dang mepishia metetdaktsüba sülen GPRN/NSCN aser NNC/FGN lennirtemi Nagaland nung aliba Naga nunger asoshi sentong khenyongi balaka yanglutsü ta metetdaktsü.
“Onoki framework agreement raksatsütsü meranger ta NSCN (IM)-i bilemer süra parnoki interlocutor, R.N. Ravi dang asüngdangtsüla. Parnok indang framework agreement nung Nagaland nung aliba Naga nunger asoshi kecha mali,” ta Ato kilonser, N. Kitovi Zhimomi-i tanü o jembidang ashi.
India sorkar aser NSCN-IM tsüngda framework agreement agitepbaji Manipur nungbo tsüngpret ama pelashishia agizük aser Manipur nung Naga nunger aliba tesemtem nung shimo milen tsükloker benjungtep saka iba mapang Nagaland nungbo kanga azüngmeyaka liasü, ta N. Kitovi-isa ashi.
Manipur nung aliba Naga nunger atema junger ta asübaji Nagaland nung alirtem atemabo majung asütsü akok. GPRN/NSCN-i Nagaland nung aliba kintem taginüba atema inyaker aser noktaker ta India sorkari angateta lir, anungji asenoki iba tensaji metettsüla aser angatettsüla, ta paisa metetdaktsü.
India sorkari Naga nunger pei sasa yimsü süa alitsü aser balaka razüka aotsübaji tamakoktsü ta jangjajangja shiogo, anungji GPRN/NSCN-i NNC aser FGN den külemi Nagaland nung aliba Naga nunger asoshi sentong balaka yanglutsüla, ta Kitovi-isa ashi.
Tanü sentong nung Envoy to collective leadership, Alezo Venuh-i GPRR/NSCN chairman, Gen (Retd) Khole Konyak-i züluba osang zünga metetdaktsü.
“GPRN/NSCN-i telongjem atema mapa inyaktsü tenzüker joko küm 8 ajunger aser maneni inyaktsü. Nübortem den asüngdangyatepa telongjem bener arutettsü ta onoki amanger aser India sorkar den Indo-Naga yimten ken o olemtep nung ajaki agizüktetba telemtetba ka agitsü atema inyaktsü” ta Khole-isa ashi.
Naga nunger mulungtet teloktemi telongjem aser yimjung yanglutsü tayongzükba agütsüba nung ajemdaker November 22, 2007 nü NSCN (K) aser NSCN (IM) nung tekolakpurtemi Naga nunger atema yimten sabang ka tentettsü atema mera agi. Iba inyakyim ya Naga nunger tongti telok ajaki pela agizük. Ajisüaka, December 2007 nung NSCN-IM chairman Isak Chishi Swu-i NSCN (IM) pur shinga Naga nunger longjemba mapa nung shilem agitsü mapa melenzüktsü ta osang metetdaktsü, ta GPRN/NSCN mendenbubaisa metetdaktsü.
Iba sülen Naga nunger longjemtsü asoshi inyakba mapa anema parnoki olulutem prokshi aser iba mapang parnoki kin nung ajemdaker o jembi aser “backdoor” unification ta jaloktsü. NSCN (IM) atema telongjem ta asübaji, Naga nunger yimten telok ajaki parnok dang tatok meshitsü aser parnok ket nung bendanga agütsütsüla ta tangatetba lir, ta GPRN/NSCN-isa ashi.
Naga nunger ka ket nungi kibong senmang mesüra Naga yimten temeten tashiyim agi agientsübaji ozüng alema inyakba mapa ka lir. Naga yimten tebilemtsü atema inyakba mapa nung Myanmar mesüra Manipur mesüra Arunachal Pradesh nungi Naga nunger ajak shilem lir, ta parnokisa shisem.
Tanü GPRN/NSCN designated camp, Khehoi nung ayongzüka agiba sentong nung Naga nunger mulungtet teloktem aser Naga Political Groups (NPG) balala nungi lennirtemi o jembia liasü.
Sentong nung tetushi süa jaokertem – L Shalem Konyak, president Nagaland GB Federation, Leisha Phom, president PPC cum Convenor 6 tribes Federating Tribal Unit ENPO aser Lendinokdang Ao, president NTC nunger den peace activist Niketu Iralu-i o jembi.
Ano, NNC President, Kiumukam Yimchunger, NNC president Z Royim Yimchunger, FGN Kilo Kilonser, Puthai Lam aser NNC president Temjenyanger Aier nungertemia pusema nungitba o jembi.