GPRN/NSCN-i asür Khekiho Zhimomi mang ayimer

Dimapur, November 27 (TYO) : Nagaland nungi Rajya Sabha MP, asür Khekiho Zhimomi ajungbena iba akümli toktsür aoba osang angashia kanga aoksar aser pa asüba ya Nagaland nung alirtem asoshi takoksa ulura lir, ta MIP GPRN/NSCN-i sangdong ka nung metetdaktsü.

Nagaland State Assembly nung mapang talangka nübortem asoshi inyaka aruba sülen pai Indian Parliament nung Nagaland tenüng nung shilem tagidak lia pa asü.

Kin o kin telemsa melii inyaker Naga nunger lennir kar rongnung asür Khekiho Zhimomi dena liasü. Oset tejen karbo taseni melenteter saka Tsüngremi moatsüba nisung asür Khekiho Zhimomi amala sempet aika aliba nisung melentsübo makok. Naga nunger lennir chichiba ka samaogo ta NSCN Chairman Gen. (Retd) Khole Konyak-i ashiba olen ka GPRN/NSCN sangdong nungsa shia lir.

Tepela aser tia tajung mapang asenoki Tsüngrem nem tenüngsang agütsür aser timtem-tuoshi mapang asenoki Tsüngremer taochi nung jenoker. Tsüngremi tasür kibong nem anisüngzük agüjang ta sarasademtsür, ta GPRN/NSCN-isa sangdong nung metetdaktsü.