GPRN/NSCN-i Kahoto Zhimo indang osang jangjashitsür

Dimapur, July 21 (TYO) : July 18, 2015 nü GPRN/NSCN ketdangsertemi Harjeet Singh den saru magütsüba onük jembitsü atema aodang Kahoto Zhimomi-i paji Harjeet Singh den business partner ta ashi, ajisüaka osangkakettem nungbo Kahoto Zhimomi ji New Orchid’s Shop nung mapa inyaker ta sangdong, ta MIP GPRN/NSCN sangdong ka nung metetdaktsü.
Pai Harjeet Singh tenüng nung GPRN/NSCN den saru atema khuret ajak abentsü ta ashi. Kahoto-i GPRN/NSCN ketdangsertem dang, “nenoki kechi inyakdir inyakang saka ni mulungba dang nungi talila magütsütsü,” ta ashi.
Tsümar shishilembar ka atema mapa inyaker kati yamaji jembiba ajanga GPRN/NSCN ketdangsertemi dokan shibangtsütsüsa aküm. Iba sülen mapang tatsüka dang lir Assam Rifles major kati Naga Army Brig. dangi phone süa, tekaratiba nung dokan lapokjang aji mesüra pa den nisung ajak aputsü ta amokmeren.
Sen yong masü saka Kahoto Zhimomi-i tasa tamajung atongba nung shilem agiba ajanga pa Khehoi Designated camp-i asüngdangyatsü atema anir ao. Ajisüaka, Kahoto dang asüngdangyaba mapang pai ajak melangzü aser pa dak teka sangshiba sülen ang pai ajak sapoka ashitsü tenzük, ta MIP, GPRN/NSCN sangdong nungsa shia lir.
Pai Harjeet Singh nem GPRN tongti ketdangser indang mobile number agütsü aser iba jagi Assam Rifles-i GPRN/NSCN ketdangsertem amokmeren.
GPRN/NSCN-isa Dimapur nung New Orchid’s Shop kibur Harjeet Singh dang pai kechiba Naga yimten mapa atema tenlatsü memulunger telangzüba agüjang ta asüngdangogo.
2011 nunga pai Assam Rifles den yaritepa GPRN/NSCN ketdangser ka ket nungi pistol ka rakzük, ta sangdong nung shia lir.
Kahoto Zhimomi dak züka merenshiba atema sasa bilemtsür saka Nagaland nung India nunger shishilembar meyirjang aikati lisopur lanurtem parnok mapa inyakdakja GPRN/NSCN nem saru magütsüi arur, ta local entrepreneur temi metettsüla. Tsümar shishilembartemisa India sorkar nem income tax magütsütsü atema lisopurtem business partner ama ayur, ta GPRN/NSCN-isa shisem.
Ano külen, ACAUT ta ajartemi sangdong ka ajanga metetdaktsübaji nüngdak mali kechiyong iba telokji 2014 nung GPRN/NSCN-i mokdangogo.
ACAUT mendenpur aikati parnok tsüraburtem nungi Naga nunger anema noktakba tangatetba senmang agizüka lir aser parnoki sorkar ka saru ka ta yimyim ayimer saka atangji nungbo parnokji India nunger agent tem lir. Ano parnok rongnung karibo Naga nunger yimten taginüba samatsür Dimapur nung shishilembadak azüoktsü atema alizüng lir, ta MIP, GPRN/NSCN sangdong nungsa metetdaktsü.