GPRN/NSCN o India sorkar na yimjung mapang atsülanger

Dimapur, April 18 (TYO): GPRN/NSCN aser India sorkar na tsüngda maneni yimjung alitsü asoshi tan April ita 28 nungi ano yimjung mapang küm ka atsülangogo.
Iba ken o renemba osang ya Hombar nü metetdaktsü dang, Nagaland nung teti asoshi yimjung bener arutsü atema nübortem dena shilem agia inyaktsü atema  India sorkar o GPRN/ NSCN telok na pronglai mulunga April 28, 2016 nungi April 27, 2017 tashi  parnok tsüngda yimjung mapang atsülanger, ta metetdaktsü.
Kasa terenemba ken o nungsa ashiba agi, iba yimjung mapang nung telok anapronglai tamalen renema akaba Ceasefire Ground Rules shitak amshia anidaktsü aser nüngdak adokra telok anapronglai mulungba nung reprangshia yanglushitsü.
GPRN/NSCN telok ya Wb.Gen.Neokpao Konyak aser Wb.Khitovi Zhimomi nati aniba telok lir. Parnoki ashiba agi, tang NSCN-IM aser India sorkar na tsüngda Naga yimten ken o jembia aoba maparen nungbo parnoki shilem magitettsü.
“Taoba küm aika tangar maden India sorkar o NSCN-IM na tsüngda dang Naga yimten ken o jembia arur, anungji parnoki ajak tendaktsütsü ta jembibaji parnok mapa den mapeter aser yangji onok adentsübaji tamakoktsü,” ta GPRN/NSCN leniri IANS osangbener den  jembidang metetdaktsü.
Tang ya India sorkar o NSCN-IM na tsüngda yaküm 2015 küm August asem nü renemba ken o nung ajemdaker Naga yimten tebilemtsü ken o latettsü merangba mapang ka lir aser parnoki Naga nunger telong aser temang nung alirtem ajaki shilem agia dang Naga yimten latettsü ta metetdakja lir. Ajisüaka, tanü GPRN/NSCN teloki parnokbo iba ken o jembidakji medentettsü ta metetdaktsü jagi timtem alutsüa akok.
Tangar telok den külemi masü parnoka India sorkar den yimjung ken o balaka jembia latetter asünungji, Naga yimten ken o yamaji India den balaka jembitsü GPRN/NSCN tebilemba lir.