GPRN/NSCN teloki PWC dang mepelar

Dimapur, March 13 (TYO) : Tawa Nagaland Legislative Assembly nung Speaker aser Parliamentary Working Committee (PWC) nung mendenbuba Wb.Chotisu Sazoi Police complex, Chumukedima nung ayongzükba senden nung Nagaland tatartem aser Naga nunger linük tenzüker telok trok nungi lenirtem shisalemsatepba mapang nung linük tenzükertemi PWC dang mepelaba metetdaktsü saka osangkakettem nungbo chief ministeri jembiba dang adoktsü, iba jagi nübortemibo linük tenzüker ajaki August 3, 2015 nü NSCN-IM o India sorkar na tsüngda renemba ken o agizükogo ta bilemtsü südi ta tanü sangdong ka nung GPRN/NSCN teloki mepelaba ken o ka metetdaktsüogo.
Iba senden nung Chotisu Sazoi Naga yimten otsü ashi aser chief ministeri Naga nunger ajak longjemer tarutsü asoshi inyaktsü nüngdakba indang metetdaktsü. Paisa ashiba agi, paia August 3, 2015 nü renemba ken o ji mangu saka Naga yimten tebilemtsü ya akoktsü teimla tulu lir, anungji iba mapang tajung ya alangzüktsüla ta metetdaktsü ta GPRN/NSCN telokisa jangjashitsü.
Iba kasa senden nung jembidang, GPRN/NSCN ato kilonser N.Kitovi Zhimomi PWC züngsem dang parnoki August 3, 2015 nü renemba ken o kecha mangu aser memeteti ibaji pusema jajaba agi parnok dang masü saka Naga nunger ajak maksüdaktsüogo ta metetdaktsü. PWC purtemi Congress tir Sonia Gandhi ajurudang, lai parnok dang kechi ken o renema aliar memetetibo kecha meshitettsü ta langzüba jagi Naga nunger ajak maksü ajangzükogo ta paisa ashi.
Kitivo-isa Nagaland Chief minister dang pai Naga yimten tebilemtsü ken o ya tangsa telatetba kati arutsü temetetdang süra parnoki nangzükba ama sorkar menden nungi parnok alutsüla ta metetdaktsü.
” August 3, 2015 nü renemba ken o ji Nagaland nung aliba nübortemibo magizüktettsü, kechiyong Naga nunger atema kari miima ken o latettsü makok. Aji oda, Naga lima yimten ka kübok melongjemtetra aser yimten nüchiso jenjang ka mengutetra, Naga nunger asoshi Nagaland nung malirtemi telemtetba agitsü makoktsü,” ta GPRN/NSCN telokisa metetdaktsü.
Nagaland nung alirtem den masüngdangtepi oagi Naga nunger ajak atema PWC-i jembibaji shitak masü ta GPRN/NSCN telokisa aija metetdaktsü. Iba ken o nung Nagaland Home minister, Y.Patton-ibo haihaura kaa metetdaktsüogo ta parnokisa ashi.