GPS Changtongya ‘B’ Golden Jubilee among

Dimapur, October 20 (TYO): Mokokchung District kübok Government Primary School, Changtongya ‘B’ küm 50 ajungba Golden Jubilee (1967-2017) October 19, 2017 nü school campus nung mongogo, aser iba sentong nung tongti tesemdangerji Longleng ADC, Temsuwati liasü.
Sentong nung jembidang Temsuwati-i organizing committee-i pa iba maongka agütsüba atema pelaba lemsatep.
Tesayurtem dang tasa balala amshia tanurtem nem shisaliok tajung agütsütsü ajungshia pai, kaketshirtem tarutsü atema tesayurtemi tamendakdak junga yangertettsütsüla ta ayongzük.
“Kaketshirtemji tarutsü nung lokti khuret abenba senso tajung kaka kümdaktsütsü atema anitettsüla. Iba mapang nung parnoki teyari asee shisatsü nüngdaker,” ta pai ashi.
Paisa W.E.C danga school jenjang tajungba akumtsü atema tongtibang shilem agitsü ayongzük. Tesülen pai Golden Jubilee Souvenir sayaja liasü.
Sentong nungsa SDO (C), Changtongya, Chumlamo Humtsoe, PWD Ward, Medical Ward aser Church Ward Chairman-ia jembia liasü.
Iba sentong ya Primary tesayur, R.Anungla Aier leniba nung agi, Teacher Incharge, GPS, CTN ‘B’, Lanumeren Longkumer-i lokti pelaa agizük aser Golden Jubilee Planning Cum Fund Raising Committee Convenor, T. Ali Longkumer-i tepela anküp o jembia liasü.
Sentong tenzüka W.E.C Member, T. Anungla-i sarasadem aser GPS, CTN ‘B’ kaketshirtemi choreography ka saya. Ano GMS, Longchara kaketshirtemi ken ka aten aser GMS, CTN ‘A’ nungi jilushi ka ajanga shilem agia liasü.